एनआरएनए अध्यक्षमा भवन भट्ट र जमुना घलेद्धारा उम्मेद्धारी र प्रतिवद्धता घोषणा

Posted on: October 12, 2017 | views: 556

काठमाडौं ।

गैरआवासीय नेपाली संघ एनआरएनको आगामी नेतृत्वको लागि भवन भट्टसँगै जमुना घलेले अध्यक्षमा उम्मेद्धारी घोषणा गरेका छन् ।


एनआरएनएको आठौँ विश्व सम्मेलन एवं महाधिवेशन नजिकिँदै गर्दा यसको नेतृत्व लिन दुईजनाले आफ्नो उम्मेदवारी घोषणा गरेका हुन् । अध्यक्षका लागि संघका निवर्तमान उपाध्यक्ष भवन भट्टले हप्तादिन अघिनै अध्यक्षमा उम्मेद्धारी घोषणा गरेका थिए भने सदस्य जमुना गुरुङ घले आज उम्मेदवारी घोषणा गरेकी हुन् । जमुना वर्तमान अध्यक्ष शेष घलेकी श्रीमती हुन् ।


घलेले आज पत्रकार सम्मेलनको आयोजना गरी आगामी शनिबारदेखि शुरु हुन लागेको संघको महाधिवेशनमा उम्मेदवारी घोषणा गरेकी हुन् ।


उम्मेदवारी घोषणा कार्यक्रममा घलेले ‘नेपालीका लागि नेपाली’ भन्ने पवित्र उद्देश्यका साथ शुरु भएको संघमा आफूले गैरआवासीय नेपालीको माग र अपेक्षालाई पूरा गर्ने र महिला सशक्तीकरण र सहभागितालाई संस्थाको मेरुदण्डका रुपमा स्थापित गर्ने विश्वास व्यक्त गरे । 


साथै संघलाई आर्थिक, सामाजिक, सांस्कृतिक एवं कूटनीतिकस्तरमा अझ पारदर्शीरुपमा विकास गर्न र संघले अहिले निर्माण गरिरहेका मेगा परियोजनालाई समयभित्र सम्पन्न गराउन भूमिका खेल्ने प्रतिबद्धतासमेत व्यक्त गरिन् ।


संघका सदस्यसमेत रहेकी गुरुङले आफू अध्यक्ष पदका लागि योग्य उम्मेदवार भएको र महिलाले नेतृत्व गर्न सक्छन् भन्ने पुष्टि गर्नका लागि पनि आफ्नो उम्मेदवारी भएको स्पष्ट पारिन् ।

जमुना घले अष्टेलियामा व्यवसाय गर्दै आएकी अर्बपती हुन् ।


यसैबीच, अध्यक्षका अर्का प्रतिस्पर्धी भवन भट्टले पनि आज आयोजित उम्मेदवारी सभामा आफ्नो उम्मेदवारी घोषणा गरे ।


सो पदका लागि आफू योग्य रहेको दाबी गर्दै भट्टले एनआरएनको उपाध्यक्षको जिम्मेवारीमा सही ढंगले निभाएको भन्दै आफूले सम्पूर्ण गैरआवासीय नेपालीको समस्या, पीर, मर्का बुझेकाले उनिहरुको समस्या सम्वोधनका लागि उम्मेद्धारी दिएको बताए ।


उनले आवासीय र गैरआवासीय नेपालीबीच सहकार्यका लागि समन्वयको वातावरण तयार गरी एनआरएनको ‘भिजन २०२०’ तथा सामूहिक लगानीका परियोजना कार्यान्वयनमा सहयोगी भूमिका निर्वाह गर्ने प्रतिबद्धता व्यक्त गरे ।


नेपालमा पूर्वाधार विकास तथा निर्माणमा लगानी बढाउने र रोजगारीको अवसर वृद्धि गर्ने प्रतिबद्धता व्यक्त गर्दै प्रत्यासी भट्टले भने – “आफ्नो जितको पहिलो आधार नै सम्पूर्ण एनआरएनका साथीहरु हुन्, म त लगभग साझा उम्मेदवारका रुपमा उभिएको छु ।” 


उनले आफूलाई एनआरएनका संस्थापक अध्यक्ष डा उपेन्द्र महतो, जीवा लामिछाने र हालका अध्यक्ष डा शेष घलेको पनि पूर्ण साथ र सहयोग रहेको जानकारी दाबी गरे ।


विश्वभरि छरिएर रहेका गैरआवासीय नेपालीको मनमा सधँै नेपाल र नेपाली नै रहेको उनले बताए ।


भट्टले वर्तमान नेतृत्वले अघि बढाएको लाप्राक नमुना बस्ती निर्माणलाई समयमै सक्ने गरी काम गरिने पनि प्रतिबद्धता जनाए ।


यसअघि उनले एनआरएन जापानको अध्यक्ष तथा एनआरएन अन्तर्राष्ट्रिय समन्वय परिषद्को कोषाध्यक्ष तथा केन्द्रीय उपाध्यक्षको जिम्मेवारी पूरा गरेका छन् ।

भट्ट जापानमा व्यवसाय गर्दै आएका व्यवासय हुन् ।