पेस्तोल सहित ६ भारतीय अपराधी पक्राउ

Posted on: June 10, 2016 | views: 638

२८ जेठ, महोत्तरी ।
महोत्तरी जिल्लाको पोखरभिण्डा ७ पोखरभिण्डा चोकस्थित एक होटलबाट शसस्त्र प्रहरी टोलीले लोडेड पेस्तोलसहित सात जनालाई पक्राउ गरेको छ ।

पक्राउ परेका ७ जना मध्ये ६ जना भारतीय नागरिक छन् । पक्राउ पर्नेहरुमा जिल्ला महोत्तरी गौशाला नगरपालिका ११ वस्ने १६ वर्षिय अमनकुमार साह तथा भारतीय नागरिकहरु जिल्ला सितामणी सिर्सिया ८ घर बताउने १७ वर्षिय रामवली कुमार, सोही ठाउँ ७ घर बताउने १७ वर्षिय दिनेशकुमार महतो र १९ वर्षिय रञ्जितकुमार सुरी तथा भारतकै सितामणी महुअवा ५ घर बताउने राजकुमार राम, अजितकुमार महतो र सितामणी महुअवा ९ घर बताउने १७ वर्षिय हिराकुमार महतो छन् ।

सो ठाउँमा रहेको निरञ्जन शाहको होटलमा खाजा खाँदै गरेका उनीहरुलाई एपीएफ टोलीले जाँच गर्दा निजहरुको साथबाट ७.६५ एमएमको मेड इन इण्डिया लेखिएको एउटा पेस्तोल, सो को तीन वटा गोली र एउटा म्याग्जिन बरामद भएपछि उनीहरुलाई पक्राउ गरिएको हो ।

विशेष सुराकीको आधारमा सशस्त्र प्रहरी बल बोर्डर आउट पोष्ट पोखरभिण्डाबाट सशस्त्र प्रहरी निरीक्षक प्रकाशचन्द्र भट्टको कमाण्डमा खटिएको एपीएफ टोलीले उनीहरुलाई तीन राउण्ड गोली लोड रहेको अवस्थामा रहेको उक्त पेस्तोलसहित पक्राउ गरेको हो ।

एपीएफ टोलीले त्यसवेला उनीहरुको साथबाट उक्त हतियारको साथै दुई वटा भारतीय नम्बर प्लेटको मोटरसाइकल, चार थान मोवाइलफोन सेट, तीन वटा हातमा लगाउने पञ्चनोक, चाँदीको ब्रासलेट दुई वटा, सिम कार्ड दुई वटा, मेमोरिकार्ड एउटा, एक थान एटिएम कार्ड तथा नाइट्रोजन ट्याब्लेट एक पत्ता र नेपाली रुपैयाँ पाँच सय तथा भारतीय रुपैया १५ सय समेत बरामद गरेको छ ।