माओवादीले नेताको भन्दा वडा अध्यक्ष बन्न बढी योग्यता खोज्यो

Posted on: April 07, 2017 | views: 798

काठमाडौं ।

पार्टी नेतृत्व पँक्ति नै भ्रष्ट तथा अपरदर्शी रहँदै आएको एमाओवादी नेतृत्वले आफ्नो पार्टीको तर्फवाट स्थानिय चुनावमा उम्मेदवार बन्न भने दर्जन बढी योग्यता चाहिने घोषणा गरेको छ ।


माओवादी केन्द्रले आगामी स्थानीय निर्वाचनलाई लक्षित गरी पार्टीका तर्फबाट उम्मेदवार बन्न मापदण्ड तोक्दै आफ्नो सम्पूर्ण सम्पत्ति विवरण र आयस्रोत सार्वजनिक गर्नुपर्ने पहिलो बाध्यकारी व्यवस्था गरेको छ ।

स्मरणीय छ अहिलेसम्म माओवादी केन्द्रका केन्द्रिय नेताहरु आफैंले आफ्नो सम्पत्ति सार्वजनिक गरेको छैन । यहाँसम्मकी माओवादी केन्द्रले पार्टीका शिर्ष नेताहरुको सम्पत्ति विवरणबारे अनुसन्धान गर्न समिति बनाएपनि त्यसको विवरण समेत सार्वजनिक नगरि लुकाएको छ ।


स्थानीय तहमा निर्वाचित भएपछि हुन सक्ने आर्थिक अपारदर्शिता रोक्न भन्दै माओवादीले उम्मेदवार छनौट भइसकेपछि सम्पूर्ण सम्पत्ति विवरण र आयस्रोत सार्वजनिक गर्ने र यही मापदण्डभित्र पर्ने माओवादी केन्द्रका कार्यकर्ताहरुले आफ्नो क्षेत्रमा उम्मेदवारी दावी गर्न सक्ने बताएको छ ।


माओवादी केन्द्रका कार्यकर्ताहरुले उम्मेदवार दावी गर्न निश्चित योग्यताहरु देखाउन सक्नुपर्नेछ । ९ बुँदे मापदण्ड अनुसार सिंहदरबारमा केन्द्रित अधिकार जनताको घरदैलोमा पुर्याउँदै लोकतन्त्रको अभ्यास गर्न सक्नेलाई मात्र उम्मेदवार बनाउने बताएको छ । 


पार्टीको संगठन विस्तार गर्दै जनतामा पार्टीको आधार खडा गर्ने क्षमता राख्ने हुनुपर्ने बताएको माओवादीले स्थानीय तहमा लोकप्रिय, वर्ग दृष्टिकोण स्पष्ट भएको र जनयुद्धमा भूमिका खेलेको हुनुपर्ने प्रावधान बनाएकोछ ।


साथै सार्वजनिक काममा दक्ष, चुनावी रणनीतिमा दख्खलसँगै निर्वाचन आयोगले तोकेको योग्यता पुरा गरेको हुनुपर्ने बताएको छ ।


जीवनमा सार्वजनिक प्रतिष्ठा गुमाएका वा धुमिल भएका, आचरणहीन देखिएका व्यक्तिलाई उम्मेदवारी नदिने बताएको माओवादी केन्द्रले पार्टीप्रति बफादार, अनुशासित, इमान्दार कर्तव्यपरायण व्यक्ति पार्टीको उम्मेदवार बन्न सक्ने उल्लेख गरेको छ ।

यसैगरि माओवादी केन्द्रले स्थानीय तहको चुनावका उम्मेदवारलाई प्रदेश इन्चार्जबाट टिकट दिने निर्णय लिएको छ । 


माओवादी केन्द्रको बिहीबार बसेको हेडक्वार्टर बैठकले यस्तो निर्णय गरेको हो ।