बिरालोलाई चितुवा देखेपछि त्रिभुवन विमानस्थलमा आतंक,नियन्त्रण मध्यरातपछि

Posted on: April 03, 2017 | views: 194


काठमाडौं,चैत २१ । त्रिभुवन अन्तर्राष्ट्रिय विमानस्थलमा पसेको भनिएको चितुवा नियन्त्रणमा लिन मध्यरात नै कुर्नपर्ने भएको छ । सोमबार बिहान करिव ८ बजेतिर विमानस्थलको धावनमार्गमा देखिएको लामो पुच्छर भएको बन बिरालो (ढाडे बिरालो) भएको दाबी शिकारीहरुले गरेपनि त्यसबारे यकिन हुन सकेको छैन् । धावनमार्गमा देखिएर केहीबेरमा हराएपनि विमानस्थलका सिकारी, प्रहरी र कर्मचारीले केहीबेर खोजी गरेको थियो । खोजी गरेपछि उक्त चितुवा ड्रेनमा छिरेको थियो ।

ड्रेनमा छिरेको चितुवालाई निकाल्न राष्ट्रिय निकुञ्ज वन्यजन्तु संरक्षण विभागका कर्मचारी, सिकारी, प्रहरीले प्रयास गरेपनि सफल भएनन् । लामो प्रयास गरेपछि पनि निकाल्न नसकेपछि अहिले ड्रेनको दुबैतिरको मुख बन्द गरेर राखिएको छ । दिउँसो एयर ट्राफिक बढेपछि राती १२ बजेपछि त्यसलाई नियन्त्रणमा लिने तयारी थालिएको छ । बिहान ११ बजेदेखि राति ११ बजेसम्म विमानस्थलमा जहाज अवतरण र उडानको व्यस्त समय मानिन्छ ।

शिकारीको नेतृत्व गरेका गोकुल ठकुरी यसो भन्छन्

“हामीले बिरालो भेटिरहेका हुन्छौं । समाचार र हल्लाचांही बाघ र चितुवाको बच्चा भनेर भइरहेको हुनेगरेको पाउँछौं । सोमबार बिहान पनि “हामी बिरालो खेदेर आउदै मात्रै थियौं । चितुवा भेटिएको हल्ला शहरभरी फैलिएछ । झिसमिझैमै स्याल तथा ढाडे बिरालो विमानस्थलमा कराउंछन् । उझ्यालो हुदै गएपछि लुक्छन् । यो क्रम वर्षौंदेखि चलिरहेकै छ ।