सहिद गौतमको परिवारलाई एमालेको ५ लाख र ल्याप्टप सहयोग

Posted on: March 16, 2017 | views: 412

पप्पु गुरुङ्, ३ चैत, कञ्चनपुर । नेकपा (एमाले) ले भारतीय सशस्त्र सीमा बल (एसएसबी)को गोलीबाट मारिएका सहिद गोविन्द गौतमको परिवारलाई ५ लाख रुपैया र ल्यापटोप सहयोग गरेको छ । मेची–महाकाली अभियान अन्तर्गत बिहीबार कञ्चनपुर सदरमुकाम महेन्द्रनगरमा आयोजित सभामा एमाले अध्यक्ष केपी शर्मा ओलीले ५ लाखको चेक र ल्याप्टप पार्टीका जिल्ला अध्यक्ष तारा लामा तामाङ मार्फत गौतमको परिवारलाई हस्तान्तरण गरेका हुन् । सचिव योगेश भट्टराईका अनुसार गौतमको परिवारलाई ५ लाख सहयोग र उनका छोरीका लागि एमालेले ल्यापटप हस्तान्तरण गरेको हो । रकम हस्तान्तरण गर्दै एमाले अध्यक्ष ओलीले उक्त घटनामा भारत सरकारले नेपालसाग माँफी माग्नु पर्ने, दोषी माथि कारवाही गर्नु पर्ने र पीडित परिवारलाई भारतले सम्मान जनक क्षतिपूर्ति दिनुपर्ने आफूहरुको माँग रहेको जानकारी गराए । ओलीले गौतमका छोरा छोरीको शिक्षाका लागि राज्यले केही नगरे एमालेले पढाइ दिने आश्वासन पनि दिए । ‘शहीद गोविन्द गौतमको परिवारलाई एमालेले सम्मान स्वरुप ५ लाख रकम उपलब्ध गराएको छ । छोरीहरुको शिक्षा दिक्षाका लागि चिन्ता नलिनूस, अरु कोही छैन भने एमाले छ,’ ओलीले भने– ‘आनन्द नगरमा घाइते भएका टीकाराम चापागाईंको उपचारको जिम्मा एमालेले लिन्छ । गौतम गत फागुन २६ गते पुनर्वासको आनन्द बजारमा एसएसबीको गोलीबाट मारिएका थिए ।