नेपाल इण्डिया सीमा लडाईका महान शहिद गोबिन्दको अन्तिम बिदाई

Posted on: March 12, 2017 | views: 774

कञ्चनपुर, २९ फागुन ।

भारतीय सीमा सुरक्षा बल एसएसबीको गोलीबाट गत बिहीबार मृत्यु भएका पुनर्बासका गोविन्द गौतमको आज राष्ट्रिय सम्मान सहित अन्त्येष्टि गरिएको छ । उनको अन्तिम बिदाईको लागि हजारौंको संख्यामा मानिसहरु जम्मा भएका थिए ।

धनगढी स्थित सेती अस्पतालबाट शब यात्रा निकालिएको थियो । शब यात्रामा हजारौं सर्वसाधारणको सहभागिता रहेको छ । अस्पतालबाट शव यात्रा गरेर गौतमको शव झण्डै ६ किलोमिटर टाढाको दोदा नदी किनारमा अन्तिम बिदाई गरिएको थियो ।

सरकारले शहीद घोषणा गरिसकेका गौतमको सम्मानमा नेपाल प्रहरीले ११ तोपको सलामी दिएको थियो । उनको शवयात्रा धनगढी, डोके बजार, चौराहा, त्रिनगर भन्सार हुादै दोदा लगिएको थियो ।

उनको शव गृहनगर पुनर्वासमा श्रद्धाञ्जलीका लागि केहिबेर राखिने भनिएपनि समय अभावका कारण सीधै दोदा नदी किनार लगिएको थियो । शबयात्राका क्रममा सर्वसाधारणले भारत र स्थानीय प्रशासनविरुद्व चर्का नाराबाजी लगाएका थिए ।

उनको राष्ट्रिय सम्मानका साथ अन्त्येष्टि गर्ने भनिएपनि सरकारका कुनै प्रतिनिधिको सहभागिता नरहेको भन्दै स्थानीय प्रशासन विरुद्व नाराबाजी गरेका थिए ।

नेपाल–भारत २०० नम्बर सीमा स्तम्भमा पर्ने स्थानमा नेपालीले कल्भर्ड निर्माण गरी पानीको निकासका लागि ह्युमपाइप राख्ने विषयमा नेपाली र भारतीय नागरिक बीच विवाद भएको थियो ।

उक्त विवादलाई लिएर झडकको स्थिति हुने देखिएपछि नियन्त्रणमा लिन भारतीय सीमा सुरक्षा बल एसएसबीको गोली लागेर पुनर्वास नगरपालिका–८ का २५ वर्षीय गोविन्द गौतमको मृत्यु भएकोथियो । एसएसबीको गोली लागेर गम्भीर घाइते भएका गौतमलाई उपचारका लागि धनगढी लैजादै गर्दा मृत्यु भएको थियो ।

ह्युमपाइप राख्न भारतीय पक्षले अवरोध गरेपछि आक्रोशित नेपालीले भारतीय भूमिमै गएर उनीहरुलाई लखेटे पछि दोहोरो झडपको स्थिति बनेको इलाका प्रहरी कार्यालयले दाबी गरेको थियो ।

पुनर्वासका स्थानीयवासीले भारतको स्थानीय सहर बसाइन जाने बाटोमा ह्युमपाइप राखिरहेका थिए । पुनर्वास क्षेत्रमा सीमा अतिक्रमणको विषयलाई लिएर यस अघि पनि किचलो हुने गरेको थियो ।