भारतीय हस्तक्षेपविरुद्ध कञ्चनपुरमा जुलुश प्रदर्शन, भारतीय गाडीमा तोडफोड

Posted on: March 09, 2017 | views: 553
पप्पु गुरुङ्, २६ फागुन, दोधारा चाँदनी । कञ्चनपुरको पुनर्वासमा भारतीय सुरक्षाकर्मी (एसएसबी)ले नेपाली नागरिकको हत्या गरेको भन्दै सदरमुकाम महेन्द्रनगरमा जुलुश प्रदर्शन भएको छ । विहिबार विहान पुनर्वासको आनन्दबजारमा भारतीय प्रहरीको गोली लागेर स्थानीय गोविन्द गौतमको मृत्यु भएको थियो । घटनाको विरोधमा आज सााझ एमाले निकट युवा संघ नेपालले सदरमुकाम महेन्द्रनगरमा प्रदर्शन गरेको हो । जुलुशमा ‘भारतीय विस्तारवाद मुर्दावाद, हस्तक्षेप बन्द गर, हत्यारालाई कारवाही गर’ जस्ता नारा लगाइएको थियो । युवा संघका केन्द्रीय सचिव अशोक चन्दका अनुसार घटनाको विरोधमा महेन्द्रनगरमा एक घण्टा चक्का जाम समेत गरिएको छ । यसैबीच घटनाको विरोधमा नेकपा एमाले कञ्चनपुर जिल्ला कमिटीले विरोध प्रदर्शन गरेको छ । यता प्रहरीले युवा संघको जुलुश प्रदर्शनमा भारतीय नम्बरको मोटर साइकल र गाडीमा तोडफोड भएको जनाएको छ ।