निर्वाचनका लागि ४५ हजार म्यादी प्रहरी भर्ना गरिने, को–को हुन पाउँछन् ?

Posted on: March 04, 2017 | views: 226

काठमाडौं, २१ फागुन । सरकारले स्थानीय तहको निर्वाचनका लागि ४५ हजारभन्दा बढी म्यादी प्रहरी भर्ना गर्ने भएको छ । निर्वाचनको सुरक्षाका लागि म्यादी प्रहरी भर्नाको तयारी गरिरहेको गृहमन्त्री विमलेन्द्र निधिले बताए । ‘२०७० सालमा भएको संविधानसभाको निर्वाचनका लागि ४५ हजार म्यादी प्रहरी भर्ना गरिएको थियो,’ उनले भने– ‘अहिले केही हजारले संख्या बढ्न सक्छ ।’ निर्वाचनको सुरक्षा घेरा तीन तहमा हुने मन्त्री निधिको भनाई छ । ‘सरकारको लक्ष्य भनेकै शान्त वातावरणमा निर्वाचन सम्पन्न गराउनु हो,’ उनले भने– ‘त्यसका लागि म्यादी प्रहरीदेखि सेना समेत परिचालन गरिनेछ ।’

को को लाई प्राथमिकता ?

गृहमन्त्री निधिले म्यादी प्रहरी राजनीतिक पहुँचका आधारमा भन्दा पनि योग्य व्यक्ति छनोट गरिने बताए । ‘म्यादी प्रहरी छनोटमा अब राजनीतिक सोर्सफोर्स चल्दैन,’ उनले भने– ‘पूर्व प्रहरी, पूर्व सैनिक र पूर्व म्यादी प्रहरी नै प्राथमिकतामा रहनेछन् । स्थानीय युवालाई नै बनाउनुपर्छ भन्ने अब हुँदैन् ।’

यस्तो छ भर्ना खोल्ने मन्त्रालयको तयारी

गृह मन्त्रालयका प्रवक्ता बालकृष्ण पन्थीका अनुसार म्यादी प्रहरीको भर्ना खोल्न गृह मन्त्रालयले प्रस्ताव तयार गरिरहेको छ । ‘म्यादी प्रहरी भर्नाको लागि मन्त्रिपरिषदले निर्णय गर्नुपर्ने भएकोले मन्त्रालयले प्रस्ताव तयार गरी पठाउने तयारी भइरहेको छ’, प्रवक्ता पन्थीले भने ‘४५ हजारभन्दा बढी चाहिने भएकोले त्यही संख्यामा प्रस्ताव तयार गर्न लागिएको हो ।’ प्रहरीकै सहयोगीका रुपमा रहने म्यादी प्रहरीहरुलाई निर्वाचनको केही दिन अगाडि मतदान केन्द्रहरुको सुरक्षाका लागि खटाईने छ ।