सिएनएन सुपर हिरोमा पुष्पा बस्नेत मनोनित, कसरी दिने भोट ?

Posted on: December 11, 2016 | views: 515

काठमाडौं, मंसिर २६ । विश्व प्रसिद्ध अमेरिकी टेलिभिजन सिएनएनले प्रदान गर्ने ‘सिएनएन सुपर हिरो’मा नेपालकी पुष्पा बस्नेत मनोनित भएकी छिन् । विश्व प्रसिद्ध अमेरिकी टेलिभिजन सिएनएनले ‘सिएनएन हिरो’ अवार्ड प्रदन गर्न गरेको १० वर्ष पुगेको अवसरमा पूर्व सिएनएन हिरो मध्येबाट सुपर हिरो अवार्ड प्रदान गर्न लागेको हो ।

त्यसका लागि नेपालकी बस्नेतसहित पाँच जना पूर्व सिएनएन हिरो मनोनयनमा परेका छन् । सुपर हिरोका लागि बस्नेतसँगै फिलिपिन्सका एफ्रेन पेनाफ्लोरिडा, अमेरिकाका चाड प्रेग्राके, अमेरिकाको लस एन्जल्सकी लिज म्याककारट्नी र इन्डोनेशियाकी रोबिन लिम मनोनयनमा परेका छन् ।

कारागारमा रहेका अभिभावकका बालबालिकालाई काठमाडौँको बुढानीलकण्ठमा प्रारम्भिक बाल विकास केन्द्र खोली आवासीय सुविधासहित शिक्षादीक्षाको व्यवस्था गरेर उल्लेखनीय काम गरेकोमा सिएनएनले बस्नेतलाई सन् २०१२ मा ‘सिएनएन हिरो’ अवार्ड प्रदान गरेको थियो । केन्द्रमा हाल कारागार जीवन बिताइरहेका अभिभावकका ३७ बालबालिका आश्रित छन् ।

सुपर हिरो छनौट भोटिङका आधरमा हुने

सिएनएनले प्रदान गर्ने सुपर हिरो अवार्ड विजेताको छनौट भोटिङका आधरमा हुनेछ । विश्वभरीबाट प्राप्त भोट मध्ये मनोनयनमा परेका जुन उम्मेद्वारले बढी भोट ल्याउँछ ऊ नै सिएनएन सुपर हिरो विजेता हुनेछ । नेपाली समय अनुसार यही मंसिर २७ गते बिहान ८ बजे सिएनएन सुपर हिरोबारे सिएनएन टेलिभिजनले प्रत्यक्ष प्रसारण गर्नेछ ।

यसरी गर्ने भोट

सिएनएन हिरो अवार्डके लागि भोट गर्न फेसबुक र ट्वीटरमार्फत भोटिङ गर्न सकिने सिएनएनले जनाएको छ । यस्तै सिएनएन हिरोज डट कममा गएर पनि भोट गर्न सकिनेछ । विश्वको जुनसुकै ठाउँबाट पनि जो कोहीले भोट गर्न सक्नेछन् । पुष्पालाई सिएनएन हिरो बनाउन आज (आइतबार) राति १२ बजे सम्म भोटिङ गर्न सकिनेछ ।