बुढीगण्डकी प्रभावितलाई आजदेखि मुअब्जा,कस्तो जग्गाको मूल्य,कति ?(सूचिसहित)

Posted on: November 28, 2016 | views: 276

काठमाडौं,मंसिर १३ । १२ सय मेगावाट विद्युत उत्पादन छमताको बुढीगण्डकी जलविद्युत आयोजना बन्दा प्रभावित हुने स्थानीयलाई सोमबारदेखि मुअब्जा वितरण सुरु गरेको छ । आयोजनाको डुबान क्षेत्रभित्र पर्ने गोरखा तर्फको जग्गाको मुआब्जा निर्धारण गरि सार्वजनिक गरेसँगै आजदेखि वितरण कार्य सुरुभएको हो ।


पहिलो चरणमा सोमबार गोर्खाको दर्बुङ, घ्याल्चोक र भुम्लिचोक गाविसका प्रभावितलाई मुअब्जा वितरण गरिने मुअब्जा निर्धारण समितिका संयोजक एवं गोर्खाका प्रमुख जिल्ला अधिकारी नारायण भट्टले जानकारी दिए ।


गोरखा सदरमुकाममा आइतबार पत्रकार सम्मेलन गरि मुआब्जा निर्धारण समितिका संयोजक एवम् प्रमुख जिल्ला अधिकारी नारायणप्रसाद भट्टले निर्णय सार्वजनिक गरेका थिए । बूढीगण्डकी जलविद्युत आयोजनामा बन्दा तीन गाविसका ४ हजार रोपनी जग्गा आयोजना बन्दा प्रभावित हुनेछ । जसका लागि ३ अर्ब रुपैयाँ बढी मुअब्जा वितरण गर्नुपर्ने अनुमान गरिएको छ ।


जग्गालाई ११ भागमा विभाजन गरेर मुअब्जा निर्धारण गरिएको छ । समग्रमा प्रति रोपनी न्यूनतम ५ लाख २५ हजार रुपैयाँदेखि अधिकतम ८ लाख ३५ हजार रुपैयाँ मूल्य निर्धारण गरिएपनि कम जग्गा हुने र पछि जग्गा किन्नेका लागि विशेष ब्यवस्था गरिएको प्रमुख जिल्ला अधिकारी भट्टले बताउनुभयो ।


यसबीचको अवधिमा जग्गा किन्नेहरुले तोकिएको मुअब्जाको ३० प्रतिशत मात्रै रकम पाउने छन् । अन्यत्र कहिँ घर–जग्गा नभएका र ५ रोपनीभन्दा कम जग्गा भएका विस्थापितलाई तोकिएको रकमभन्दा १५ प्रतिशत र ५ देखि १० रोपनीसम्म जग्गा हुनेलाई १० प्रतिशत थप मुआब्जा दिइने छ ।


घर, गोठ, उद्योग, कलकारखाना तथा बोटविरुवालगायतका अन्य वैयक्तिक भौतिक सम्पत्तिहरूको लगत लिन अलग्गै टोली खटाएर मूल्यांकन गरी मुआब्जा दिइने छ । प्रभावित प्रत्येक घरलाई बढीमा १० लाखसम्मको समायोजित मूल्यमा सेयर दिने र त्यसको ५० प्रतिशतसम्म अनुदान दिनका लागि सरकारसमछ सिफारिस पठाउने मुअब्जा निर्धारण समितिले जनाएको छ ।


यो आयोजना बन्दा ४५ हजार जनसंख्या पूर्णरुपमा विस्थापित हुनेछन् । आयोजनाले व्यक्तिको नामममा रहेको ५८ हजार रोपनी र बाँकी सरकारी स्वामित्वमा रहेको गरी डेढ लाख रोपनी जमिन ओगट्ने छ ।

आयोजनाबाट गोरखाका १४ र धादिङका १३ गाविसका बासिन्दा प्रभावित हुनेछन् । भौतिकरुपमा भने आयोजनाबाट ३५ सय ६० घर परिवार र १९ हजार ५ सय ९० जनसंख्या विस्थापित हुनेछन् भने आर्थिकरुपमा ४५ सय ५६ घर परिवार र २५ हजार ६३ जनसंख्या विस्थापित हुनेछन् ।


साथै प्रत्यक्ष प्रभाव पर्ने परिवारहरु, एकल महिला, अशक्त परिवार, लोपोन्मुख जाती, आदिवासी जनजाती, सुकुम्वासी लगायतका जनताहरुको विशेष व्यवस्था गर्न, डुबान क्षेत्रमा परी सम्पूर्ण घर जग्गा अधिग्रहणमा परेका र अन्यत्र घर जग्गा नभएका घरधुरीलाई पुनर्वास व्यवस्थापनका लागी एकिन भएका स्थानहरुमा प्रति घरधुरी १ रोपनी जग्गा र १० लाख रुपैयासम्मको पुनर्वास अनुदान समायोजित मूल्यमा दिन पनि नेपाल सरकार समक्ष सिफारिस गरेको भटट्ले जानाकारी दिनुभयो ।


आयोजना प्रभावित जिल्लामध्ये गोरखातर्फ ३० हजार ७८ रोपनी र धादिङतर्फ २८ हजार ७५ रोपनी गरी जम्मा ५८ हजार १ सय ५३ रोपनी जग्गाको मुआब्जा दर निर्धारण गरी मुआब्जा वितरण गर्नुपर्नेछ । आयोजनाको अनुमानित लागत झण्डै २ खर्ब ६० अर्ब रुपैयाँ रहेको छ ।