चालकको बयानः'दमौलीबाट म चलाउँछु भन्नुभयो,गाडी कसरी उछिटिएर गयो थाहा पाइँन'

Posted on: September 25, 2016 | views: 1731

काठमाडौं,असोज ९ ।  आमालाई मुक्तिनाथ धामको तीर्थाटन गराएर फर्किँदै गरेका पूर्वगृहमन्त्री माधवप्रसाद घिमिरेले आफै चलाएका जीप बेपत्ता भएको छ ।  घिमिरे  स्कारपियो जीपमा आमा र आफन्त लिएर मुक्तिनाथ गएका फर्कदै थिए । उहाँहरु पोखरा हुँदै आइतबार काठमाडौं फर्किँदै थिए ।


त्रिशुलीमा खसेको जीपबाट उछिट्टिर बाँच्न सफल भएका घिमिरेका चालक बिष्णु राईले नै प्रहरीलाई सबैभन्दा पहिले दुर्घटनाको खबर गरेका थिए ।  दुर्घटनामा घिमिरेकी आमा र अंग रक्षकसहित ३ जनाको ज्यान गएको छ । दुर्घटनामा ज्यान गुमाउनेमा घिमिरेकी आमा चैतन्य कुमारी घिमिरे, आफन्त नारायण प्रसाद काफ्ले र अंगरक्षक सशस्त्र प्रहरीका सई रामचन्द्र कार्की रहेका प्रहरीले जनाएको छ ।


दमौलीमा केहीबेर रोकिएपछि घिमिरेले चालक राईलाई भनेका थिए-तिमी थाकेका छौ, केबलकारसम्म म चलाउँछु, अनि तिमी चलाउनू । तर, केबलकार अर्थात कुरिनटार नपुग्दै गाडी त्रिशुलीमा खस्यो ।


घिमिरेको भनाइ सम्झिँदै चालक राईले भने- केबलकार चढ्ने ठाउँ आउन एकरदुई किलोमिटर छ भने जस्तो लाग्छ, त्यसपछि गाडी कसरी उछिटिएर गयो केही पनि थाहा पाइँन । चितवनको दारेचोकमा दुर्घटनामा परेका पूर्वमन्त्री माधव घिमिरेको खाजी कार्य आजका लागि स्थगित भएको छ । 

दुर्घटनामा घाइते भएका चालक विष्णु राई भरतपुर अस्पताल भर्ना गरिएको छ ।