एमाले नेता पाण्डेद्धारा प्रदेशको सिमाना र वैवाहित अङ्गीकृत नागरिकतामा संविधान संशोधन हुन खोजेको धारण

Posted on: September 13, 2016 | views: 379

२८ भदौ, खोटाङ
नेकपा एमाले नेता सुरेन्द्र पाण्डेले संविधान संशोधनका विषयमा सरकारले ह्वाईट पेपर ल्याउनु पर्ने बताउनुभएको छ । प्रेस चौतारी नेपाल खोटाङले मङ्गलबार दिक्तेलमा आयोजना गरेको पत्रकार सम्मेलनमा नेता पाण्डेले सत्तारुढ दलले संविधान संशोधनको आधारका विषयमा ह्वाईट पेपर ल्याउनुपर्ने धारणा राख्नुभएको हो ।

एमाले दिक्तेल नगर कमिटिको दुई दिने अगुवा कार्यकर्ता प्रशिक्षणकाक्रममा खोटाङ आउनुभएका नेता पाण्डेले प्रदेशको सिमाना निर्धारण, वैवाहित अङ्गीकृत नागरिकता लगायतका विषयमा स्वएम् सत्तारुढ दलको स्पष्ट धारणा नआएको बताउनुभयो । “संविधान संशोधन र परिमार्जन गर्न सकिन्छ ।” एमाले स्थायी समिति सदस्य समेत रहनुभएका नेता पाण्डेले भन्नुभयो, “यसका विषयमा सरकारले ठोस कारण र आधारहरु ल्याएर आउनुपर्छ ।”

प्रदेशको सिमाङ्कनकाक्रममा सुनसरी र कैलाली फुटाउने÷नफुटाउने, तराई–पहाड अलग गर्ने÷नगर्ने विषयमा स्वएम् सत्तारुढ दलभित्रै विवाद रहेका कारण पहिला काङ्ग्रेस, माओवादीले सहमती गरेर प्रस्ताव ल्याउनुपर्ने पाण्डेले बताउनुभयो । पूर्व अर्थमन्त्रीसमेत रहनुभएका नेता पाण्डेले सत्तारुढ दलले एकमत भएर संविधान संशोधनको प्रस्ताव ल्याउनेमा आशंका व्यक्त गर्नुभयो ।

सत्तारुढ दलबीचमै गञ्जागोल र लडाइँ रहेका कारण उनीहरुको एकमतमा संशोधन प्रस्ताव आउन कठिन रहेको पाण्डेको भनाइ छ । नेता पाण्डेले प्रधानमन्त्री पुष्पकमल दाहालको भारत भ्रमण औपचारिकता र सद्भावनामा सिमिति हुने बताउनुभयो । भारत भ्रमणबाट नयाँ सम्झौता हुने सम्भावना नरहेको पाण्डेले जिकिर गर्नुभयो ।