महाकाली नदीमा पानीको बहाव एक लाख ८५ हजार क्युसेक नाघ्यो

Posted on: July 01, 2016 | views: 399

पप्पु गुरुङ्, १७ असार, दोधारा चाँदनी । लगातारको वर्षाका कारण महाकाली नदीमा पानीको बहाव आज बिहानबाट बढेको छ । ईलाका प्रहरी कार्यालय गड्डाचौकीका अनुसार केही बेर अघि गरिएको मापन अनुसार महाकाली नदीमा पानीको बहाव एक लाख ८५ हजार क्युसेक नाघेको छ । पानीको बहाव बढेपछि सीमावर्ती महाकाली नदीमा रहेको शारदा ब्यारेज (वनबासा पुल) मा चार पाङ्ग्रे सवारी साधनलाई बिहान १० बजेदेखि आवागमनमा रोक लगाइएको छ । महाकालीमा पानीको बहाव एक लाख क्युसेक नाघेपछि भारतीय पक्षले पुलको अवस्था नाजुक रहेका कारण ठूला सवारी साधनलाई रोक लगाउादै आएको छ । इलाका प्रहरी कार्यालयका प्रहरी नायब निरीक्षक गोकुल बलायरले पुलमा मोटरसाइकल, पैदलयात्रीलाई भने रोक नलगाइएको जानकारी दिनुभयो । सुदूरपश्चिमको पहाडी जिल्ला बैतडी र दार्चुलामा वर्षा भएका कारण पानीको बहाव बढ्दै गइरहेको छ । यता दोधारा चाँदनी क्षेत्रमा तटिय क्षेत्रमा बसोबास गर्ने स्थानियहरुलाई सजग रहन भनिएको छ् ।