आयल निगमका कर्मचारीलाइ केराको भत्ता

Posted on: May 02, 2016 | views: 313

१७ बैशाख, काठमाडौं ।
सार्वजनिक संस्थानले आफ्ना कर्मचारीलाई लुगा धुनेदेखि केरा भत्तासम्म दिने गरेको पाइएको छ। राजधानी दैनिकमा समाचार छ।
 
वर्षौंदेखि नोक्सानीमा चल्दै आएको नेपाल आयल निगमले कर्मचारीलाई लुगा धुने र हेटौंडा सिमेन्ट उद्योगले केरा र सख्खर भत्ता दिने गरेको पाइएको हो।
 
अर्थ मन्त्रालयले विभिन्न संस्थानले कर्मचारीलाई दिने गरेको भत्ताको विवरण माग गर्दा यस्तो तथ्य फेला परेको हो। मन्त्रालयका अनुसार लामो समयदेखि नोक्सानीमा सञ्चालन भएर झन्डै ३३ अर्ब रुपैयाँ सञ्चित नोक्सानीमा सञ्चालित नेपाल आयल निगममा कार्यरत कर्मचारीले मासिक रुपमा लुगा धने भत्तासमेत पाउने गरेका छन्।
 
निगमले आफ्ना कर्मचारीलाई लुगा धुने शीर्षकमा प्रतिमहिना ३ सय ७५ रुपैयाँ भत्ता दिँदै आएको छ।  आयल निगमका कर्मचारीले घर मर्मत र संरक्षण भत्ता पनि पाउँदै आएका छन्।
 
निगमले कर्मचारीलाई प्रतिमहिना १ हजार ६ सय २० रुपैयाँ घर मर्मत संरक्षण भत्ता दिने गरेको छ। यस्तै कर्मचारीले पेट्रोलियम पदार्थ जोखिम भत्ताबापत प्रतिमहिना ४ हजार ५ सय रुपैयाँ पनि पाउँदै आएका छन्।