दीक्षितलाई अदालतमा उपस्थित गराउन अख्तियारलाई सर्वोच्चको आदेश

Posted on: May 02, 2016 | views: 211

काठमाडौं,बैशाख १६ । साझा यातायातका अध्यक्ष एवं वरिष्ठ पत्रकार कनककणि दीक्षितलाई अदालतमा उपस्थित गराउन सर्वोच्च अदालतले अख्तियारलाई आदेश दिएको छ । बन्दी प्रत्यक्षीकरण रिटमा सुनुवाइका लागि सोमवार लिखित जवाफ र दीक्षितलाई पनि उपस्थित गराउन कायममुकायम प्रधानन्यायाधीश सुशीला कार्कीको एकल इजलासले अख्तियारलाई निर्देशन दिएको हो। अख्तियारले अकुत सम्पत्ति कमाएको आरोपमा दीक्षितलाई पक्राउ गरेपछि कनकमणि दीक्षितका तर्फबाट उनकी पत्नीले अख्तियार दुरुपयोग अनुसन्धान आयोग, विशेष अदालतलगायतलाई विपक्षी बनाई रिट दायर गरेकी थिइन्। 

रिट निवेदकको पक्षमा वरिष्ठ अधिवक्ता शम्भु थापा, हरिहर दाहाल, सतिशकृष्ण खरेल तथा अभिवक्ताहरु टिकाराम भट्टराई, दीनमणि पोखरेल र ओमप्रकाश अर्याल लगायतले बहस गरेका थिए । अकूत सम्पत्ति जोडेको अभियोगमा अख्तियारले यही वैशाख १० गते दीक्षितलाई पक्राउ गरेको थियो ।