नुवाकोटमा मिनीट्रक दुर्घटना:मृत्यु हुनेको संख्या बीस पुग्यो (अपडेट)

Posted on: December 15, 2018 | views: 134

नुवाकोट,मंसिर २९ -नुवाकोटको दुप्चेश्वर गाँउपालिका वडा नं १ घ्याङफेदीमा शुक्रबार साँझ मिनीट्रक दुर्घटना हुदाँ मृत्यु हुनेको सङ्ख्या बीस पुगेको छ । घाइते भएका पन्ध्र जनाको काठमाडौमा उपचार भइरहेको छ ।
दुप्चेश्वर गाँउपालिका वडा न. ६ सिम्टाङबाट घ्याङफेदीको सिसिपुतर्फ गइरहेको बा.३ ख ३९१३ नंं को मिनीट्रक घ्याङडाँडामा दुर्घटना हुदाँ घटनास्थलमा नै १८ जना र उपचारको लागी अस्पताल लैजाने क्रममा रामतीमा एकजना र उपचारको क्रममा काठमाडौको शिक्षण अस्पतालमा थप एकजनाको मृत्यु भएको जिल्ला प्रहरी कार्यालयका प्रहरी नायव उपरीक्षक भीमलाल भट्टराईले जानकारी दिनुभयो । उहाँको अनुसार घटनामा तीन जना महिला र १७ जना पुरुषको मृत्यु भएको छ ।
मृतक मध्ये घटनास्थलमा ज्यान गुमाएका घ्याङफेदीका रिभल तामाङ, आइते तामाङ र शिखरवेशीका रितेश पण्डितको पहिचान खुलेको छ । यसैगरी उपचारको लागी अस्पताल लैजाने क्रममा रामतीमा केनम तामाङ र उपचारको क्रममा शिक्षण अस्पताल काठमाडौमा शुकराम तामाङको मृत्यु भएको दुप्चेश्वर गाँउपालिका अध्यक्ष योबिन्द्रसिंह तामाङले जानकारी दिनुभयो ।
दुर्घटनामा घाइते भएकालाई उपचारको लागी अस्पताल पठाउन सवारी साधनको अभावले ढिलाई भएको थियो । साँझ पाचबजे भएको घटनामा घाइतेको उद्धार घटनास्थलबाट राती आठ बजेसम्म गरेपनि गाडी अभावले अस्पताल पठाउन राती दश बजेसम्म कुर्नु परेको तामाङले बताउनुभयो । घाइतेलाई राती अबेर मिनीट्रकहरु मार्फत पठाएको र बीच बाटोमा आइपुगेपछि मात्र एम्बुलेन्स मार्फत काठमाडौ लगिएको हो । घाइते मध्ये आठ जनाको शिक्षण अस्पताल र सात जनाको वीपी स्मृति अस्पतालमा उपचार भइरहेको छ ।
मिनीट्रकमा ४० जना भन्दाबढी यात्रु रहेको र दुर्घटना पश्चात कोही हामफालेको र कोही मिनीट्रकको पछाडी भएकाले सुरुमा नै खसेकाहरु सामान्य घाइते भएका छन् ।
सिम्टाङ स्थित आफन्तकहाँ आयोजित घेवामा सहभागी भएका सहित अन्य यात्रु बोकेको गाडी साँझ पाँच बजे घ्याङडाँडामा दुर्घटनामा परेको हो । कच्ची सडकमा उकालोतर्फ जादै गरेको मिनीट्रक दुर्घटना हुदाँ सडकबाट करीब पाँचसय मिटर तल तादी खोलामा पुगेको थियो ।