सिंघानिया हत्याका मुख्य योजनाकार साह नै रहेको प्रहरीको दाबी,परिवार भन्छन-'साह निर्दोश हुन'

Posted on: May 02, 2016 | views: 235

जनकपुरधाम, चैत २४  ।प्रहरीले संचार उद्यमी अरुण सिंघानियाको हत्याको मुख्य योजनाकार धनुषा क्षेत्र नं। ४ का  निलम्बित सांसद संजय साह रहेको दावी गरेको छ । जिल्ला प्रहरी कार्यालय धनुषाले बुधबार पत्रकार सम्मेलन गरेर जनकपुर बम काण्डको अभियोगमा थुनामा रहेका निलम्बित सांसद संजय साहले नै सिंघानियाको हत्या गरेको दावी गरेको हो ।   

जनकपुर डुडे तथा रेडियो टुडेका सञ्चालक सिंघानियाको २०६६ साल फागुन १७ गते होली पर्वको दिन जनकपुरको शिवचोकमा गोली हानी हत्या भएको थियो ।

हत्यामा संलग्न रहेर फरार भएको भन्दै तराईमा सशस्त्र गतिविधि गर्दै आएका जनतान्त्रिक टाइगर जनशक्ति पार्टीका अध्यक्ष धर्ती सिंह भनिने चन्द्रदीप यादवलाई गएको चैत १७ गते  पक्राउ परेपछि सिंघानिया हत्याकाण्डको अनुसन्धानलाई प्रहरीले तिव्रता दिएको छ ।

जनकपुर टुडे पत्रिकामा आफूलाई बद्नाम गराउने समाचार प्रकाशन गरेको भन्दै साहले पत्रिकाका प्रकाशक सञ्चार उद्यमी सिंघानियाको हत्या गराएको प्रहरी उपरीक्षक रामदत जोशीले दावी गर्नुभयो ।

साहले सिंघानियाको हत्या गर्न गोली हान्ने मान्छे मिलाउनका लागि चन्द्रदीप यादवलाई  र रुपैयाँ तथा हतियार व्यवस्थापन गर्न रामविनय यादवलाई जिम्मा दिएको अनुसन्धानबाट खुलेको प्रहरीले जनाएको छ ।

६ वर्ष अघि गोली हानी हत्या गरिएका सञ्चार उद्यमी सिंघानिया हत्यामा संलग्न रहेको आरोपमा प्रहरीले चन्द्रदीप यादव, एकलाल भन्ने योगेन्द्र सहनी र अन्ती राईनलाई पक्राउ गरिसकेको छ । रामविनय यादव भने फरार छन् । पक्राउ परेकाहरुसँगको बयानको आधारमा प्रहरीले निलम्बित सांसद साहलाई प्रहरीले मुख्य अभियुक्त बनाएको छ । काठमाडौंको जेलमा रहेका साहलाई सोमबार राती जनकपुर ल्याइएको छ ।  

त्यतिबेला सिंघनिया हत्याको जिम्मा लिने तराई जनतान्त्रिक पार्टी मधेशका अध्यक्ष मुकेश चौधरीलाई पनि प्रहरीले यसअघि नै पक्रेको थियो । साहले नै भनेपछि आफूले सिंघानियाको हत्याको जिम्मेवारी लिएको तर हत्या नगरेको बताएका छन् । साहसँग राम्रो तालमेल भएपनि चौधरीको हत्यामा संलग्नता नदेखिएको प्रहरी उपरीक्षक जोशीले बताउनुभयो ।
साह निर्दोश रहेको परिवारको दावी

हत्याका आरोपी साहका परिवारजनले बुधबार नै पत्रकार सम्मेलन गरेर साह निर्दोश रहेको दावी गरेका छन् । साहकी श्रीमती रंगिलादेवी साहले राजनीतिक आडमा आफ्ना श्रीमानलाई सिंघानिया हत्यामा मुछ्न खोजेको आरोप लगाउनुभयो ।

सिंघानिया हत्यामा संलग्न मुख्य अभियुक्तलाई उन्मुक्ति दिन आफ्ना श्रीमानलाई फसाइएको उहाँले बताउनुभयो । उहाँले  मानव अधिकारकर्मी तथा समाजसेवीको रोहवरमा साहले झुटो बोलेको हो होइन पत्ता लगाउने पोलिगन टेष्ट गर्न पनि मान गर्नुभयो ।
unn.com.np