नुवाकोट प्रहरीको किन सबैले गरे प्रशंसा ?

Posted on: October 12, 2018 | views: 193

नुवाकोट । नेपाल प्रहरीले  ६३औँ स्थापना दिवस, बिहीबार विभिन्न कार्यक्रम गरी मुलुकभर मनाइएको छ ।


प्रहरी प्रधान कार्यालय, प्रदेस प्रहरी कार्यालय र जिल्ला स्थित जिल्ला प्रहरी कार्यालय मातहतमा रहेका प्रहरी युनिटहरुले विभिन्न कार्यक्रम गरी प्रहरी संगठन स्थापनाको ६३ औँ दिवस उत्सवको रुपमा कार्तिक २५ गते बिहीबार मनाइएको छ । जहानीय राणा शासनको समयदेखि नै नेपालमा प्रहरी संगठन कार्यरत रहेपनि विक्रम सम्वत २०१२ साल असोज ३० मा प्रहरी ऐन जारी भएपछि मात्र औपचारिक रुपमा प्रहरी संगठन स्थापना भएको स्मरणमा दिवस मनाउन थालिएको हो । दिवसको अवसरमा जिल्ला प्रहरी कार्यालय नुवाकोटले विभिन्न रचनात्मक कार्य एवम् सरोकारवालाहरुबीच प्रवचन कार्यक्रम गरी स्थापना दिवस मनाएको छ ।

स्थापना दिवसको अबसरमा जिल्ला समन्वय समिति नुवाकोटका प्रमुख सन्तमान तामाङले अपराध न्युनिकरण गर्दै जिल्लामा शान्ति सुरक्षा कायम गराउन जारी रहेको विभिन्न अबरोध हटाउदै प्रहरीले पाउदै आएको सफलताको प्रशंसा गर्नुभएको छ ।


उहाँले साधन र श्रोतको अभाव, कानुनी अड्चनको समयमा पूरा गर्नुपर्ने कर्तव्यलाई उच्च प्रथामिकता दिदै आएको प्रहरीलाई समयअनुकुल दक्ष बनाएर अगाडी बढाउनमा जोड दिनुपर्ने बताउनुभएको छ । जिसस प्रमुख तामाङले अपराधमा देखिएको विविधता र सुरक्षाको बढ्दो चुनौतीको बीच प्रहरीको पहुँच समेत बृद्धि गरेर जनतालाई सेवा दिन नुवाकोट प्रहरी तल्लिन हुनुपर्ने बताउनुभएको छ ।


यस्तै, नुवाकोटका प्रमुख जिल्ला अधिकारी उद्धवबहादुर थापाले थोरै जनशक्ति भएको नुवाकोटमा नेपाल प्रहरीबाट शान्ति सुरक्षाको क्षेत्रमा धेरै सफलता हासिल गरेको भन्दै प्रभावकारी रुपमा पु¥याउदै आएको शान्ति–सुरक्षाको प्रशंसा गर्नुभएको छ ।


जिल्ला सुरक्षा समितिको अध्यक्ष समेत रहनुभएका थापाले जिल्लामा अबैध गतिविधि, तस्कर तथा दलाली नियन्त्रण लगायतका सामान्यदेखि सांगठानिक आपराधिक गतिविधि विरुद्ध कुनै कसुर बाँकी नराख्न निर्देशन दिनुभएको छ ।


प्रहरीको स्थापना दिवसको अवशरमा नुवाकोटका प्रहरी प्रमुख प्रहरी उपरीक्षक बसन्तबहादुर कुंवरले नेपाल प्रहरीले स्थापनाको समयदेखि नै राष्ट्रिय अखण्डताको रक्षाको लागी क्रियाशिल रहेकाले आगामी दिनमा पनि लगनशील भइराख्ने प्रतिबद्धता जनाउनुभएको छ । प्रहरी उपरीक्षक कुंवरले विक्रम सम्वत १९९५ सालमा अमिनी प्रहरीको रुपमा स्थापना भएर २०१२ सालदेखि अहिलेको नेपाल प्रहरीको रुपमा पाएको स्वरुपको इतिहास गौरवपूर्ण रहेकाले यसको रक्षा गर्न सकल दर्जाको प्रहरी सक्षम रहदै आएको बताउनुभएको छ ।  

उहाँले राज्यको अङ्गको रुपमा अग्रभागमा रहेर कानून कार्यान्वय गराउने, समाजमा शान्ति सुरक्षा कार्यान्वय गराउने, आपराधिक नियन्त्रण र प्रभावकारी अनुसन्धान गरी समाजमा अमनचयन कायम राखेर विकाशील वातावरण बनाउने जिम्मेवारीलाई पूरा गर्न प्रतिबद्ध रहेकाले त्यसमा सरोकारवालाहरुको सहयोग अपरिहार्य रहेको बताउनुभएको छ ।


    नेपाल प्रहरीको स्थापना दिवसको अवशरमा आयोजित विशेष कार्यक्रममा नुवाकोटमा वीरगति प्राप्त गर्ने १३ जना र नुवाकोट घर भएर जिल्ला बाहिर वीरगती प्राप्त गर्ने १२ जना गरी २५ जना अमर प्रहरी प्रति सलामी र माल्यापण, नुवाकोटका जेष्ठ पूर्वप्रहरी दुप्चेश्वर गाँउपालिका वडा नं. ७ शिखरवेशी स्थित सिम्टाङका ८६ वर्षका भक्तबहादुर लामालाई सम्मान, जिल्ला प्रहरी कार्यालय नुवाकोटमा रहेर उत्कृष्ट काम गर्ने प्रहरीहरु र प्रहरी दिवसको अवशरमा आयोजित विभिन्न रचनात्मक प्रतिस्पर्धामा उत्कृष्ट भएका प्रहरीलाई सम्मान गरिएको छ ।


नुवाकोट प्रहरीले आफ्नो स्थापना दिवसको अवशर बनाएर यसअघि जिल्लाको मुख्य मुख्य शक्तिपीठ, धर्मशाला, गुम्बा एवम् पाटीपौवाहरुको सरसफाई, प्रहरी कार्यालयमा खुला रक्तदान कार्यक्रम लगातयका रचनात्मक क्रियाकलाप सम्पन्न गरेको जिल्ला प्रहरी कार्यालयका प्रहरी नायव उपरीक्षक भीमलाल भट्टराईले जानकारी दिनुभएको छ ।



कार्यक्रममा नुवाकोटका सरोकारवालाहरुले नुवाकोट प्रहरीको अहिलेको भूमिका प्रभावकारी भएकाले जिल्लामा शान्ति सुरक्षा चुस्त रहेको र आपराधिक गतिविधिमा कमी आएको भन्दै प्रशंसा गरेका थिए ।


‘सत्य, सेवा र सुरक्षणम्’ मुख्य नारा बनाएर जनताको सेवामा अहोरात्र तल्लिन रहेको नेपाल प्रहरीको स्थापना भएको ६३ वर्ष भएमा यात्रारहत भएपनि अझै अभाव, प्रभाव र दबाबबाट भने मुक्त हुन सङ्घर्षरत नै रहेको छ ।


नुवाकोटमा जिल्ला प्रहरी कार्यालय एक, इलाका प्रहरी कार्यालय पाँच, प्रहरी चौकी १५, अस्थायी प्रहरी चौकी आठ सहित कारागार, अदालत, प्रमुख जिल्ला अधिकारीको निवास र प्रशासन कार्यालय लगायतको सुरक्षा नेपाल प्रहरीले नै गर्दै आएको छ । नुवाकोटमा प्रहरीको दरबन्दी ४६७ जना रहेपनि ३२५ जना मात्र कार्यरत रहेको छ भने बाँकी रिक्त रहेको छ ।