हेलिकोप्टर दुर्घटनामा ज्यान गुमाएको शव काठमाडौमा (फोटोहरु)

Posted on: September 09, 2018 | views: 316

अशोक ढकाल
२४ भदौ, नुवाकोट । गोरखाको सामागाउँबाट यात्रु लिएर काठमाडौँ आउंदै गरेको अल्टिच्युड एयरलाइन्सको हेलिकोप्टर दुर्घटनामा परी मृत्यु भएकाहरुको शव काठमाडौँ ल्याइएको छ ।

घटनास्थलबाट शव संकलन गरी आज बिहान विदुर नगरपालिका वडा नं. ९ कोलनीसम्म मिनीट्रकमा राखेर ल्याइएको शवलाई तीन वटा हेलिकोप्टर मार्फत काठमाडौ लागिएको हो ।


हेलिकप्टर दुर्घटना स्थल म्यागङ गाँउपालिका वडा नं १ स्थित मेलुङपाखाको जंगलबाट चार घण्टाको पैदल र त्यसपछि २५ किलोमिटरको दुरीको सडकमा गाडी मार्फत विदुर ल्याइएको शवलाई अल्टिच्युड एयरलाइन्स, सिम्रिक एयर र हेली एभरेष्टको हेलिकोप्टरले ६ जनाको शव आज बिहान परीक्षणको लागी काठमाडौ स्थित त्रिवि शिक्षण अस्पताल महाराजगञ्ज लगेको जिल्ला प्रहरी प्रमुख बसन्त कुंवरले जानकारी दिनुभयो ।


गोरखाबाट काठमाडौँ आउँदै गरेको अल्टिच्युड एयरलाइन्सको हेलिकोप्टर नुवाकोटमा शनिबार दुर्घटना हुँदा पाइलट निश्चल केसी, रामेछापका ४० वर्षीय डिल्लीबहादुर गुरुङ, दोलखाका ३७ बर्षीय हिरा शेर्पा, सिन्धुपाल्चोकका २२ वर्षीय सुनिल तामाङ, गोर्खाको चुमनुबी गाउपालिका–१ का छोवाङ नुर्बु र जापानीज नागरिक हिरोमी कोमात्सुको घटनास्थलमा नै मृत्यु भएको थियो ।

हेलिकोप्टर दुर्घटना हुदाँ रुखमा ठोक्किएको तर, आगलागी नभएकाले ज्यान गुमाएकाहरुको शरीरको अङ्गहरुमा सामान्य चोट मात्र लागेको अबस्था रहेको प्रहरीले जनाएको छ ।


 हेलिकोप्टर दुर्घटनामा परी घाइते हुनुभएका गोरखाको चुमनुवी गाउँपालिका–.२ का आनी डोल्पा डिकीको मेडिसिटी अस्पतालमा उपचार भइरहेको छ । उहाँको स्वास्थ्यमा सुधार हुदै आइरहेको उपचारमा संलग्न चिकित्सकहरुले बताएका छन् ।