अधुरै रह्यो आमाले किनेर ल्याएको नयाँ लुगा र चप्पल लगाउने सपना

Posted on: August 30, 2018 | views: 200

सल्यान । वागचौर नगरपालिका–४ सेतोगुराँसका रामसिंह विकको नौ जनाको परिवार मंगलबार निक्कै खुसी थियो । उनीहरू सदाभन्दा निक्कै नै खुसी थिए, त्यो खुसी ल्याएको थियो, महिनौंपछि आमा रामकलीले किनेर ल्याएको ‘नयाँ लुगा र चप्पल ।’ दैनिक गुजारा चलाउन धौधौ रहेको विक परिवारले जसोतसो मानो काटेर भए पनि अलिकति रकम जम्मा गरेर नयाँ लुगा र चप्पल किनेर ल्याएका थिए ।

बुधबार बिहान उठेर नयाँ लुगा र चप्पल लगाउने उनीहरूको धोको थियो । तरत्यो धोको कहिल्यै पूरा भएन । मंगलबार राती नै पुरानो रहेको घरको दलिन भाँचिएर घर भत्किदा रामसिंहसहित उनका परिवारका पाँच जनाको मृत्यु भयो । स्थानीय भीम बहादुर विकका अनुसार मृतक रामसिंहको परिवार दिनभर काम गरेर दुई छाक टार्ने परिवार हुन् ।

मंगलबार मात्रै रामकलीले पाँच छोरी, एक छोरा र पति-पत्नीका लागि भनेर नयाँ लुगा र चप्पल किनेर ल्याएकी थिइन् । ‘नयाँ लुगा लगाएर विद्यालय जाने सानानानीहरूको सपना थियो होला । हिजो मात्रै वांगेलाकुरीबाट रामकलीले किनेर ल्याएकी थिइन् तर उनीहरुको त्यो सपना पूरा हुन पाएन,’ स्थानीय भीमबहादुरले भन्नुभयो ।

घरको भित्ता भत्किएर दलिन भाँचिदा घरमा सुतिरहेका ४० वर्षीय रामसिंहसहित उनकी पत्नी ३५ वर्षीया रामकली, छोरीहरू सात वर्षीया गंगा विक, ६ वर्षीया प्रमिला र चार वर्षीय छोरा रूपलालको मृत्यु भएको हो । अर्की नौ वर्षीया काइँली छोरी सुनिता भने सामान्य घाइते भएकी छन् । रामलालका ६ छोरी र एक छोरा मध्ये जेठी छोरीको भने बिहे भइसकेको थियो । माइँली छोरी १३ वर्षीया कमला र साइँली छोरी १० वर्षीया पुतला भने साथीको घरमा सुत्न गएकाले बाँच्न सफल भए ।

लगातारको वर्षाका कारण घरको भित्ता कमजोर बनेर भत्किँदा घरको दलानसमेत भाँच्चिएपछि घरको माथिल्लो तलामा सुतिरहेका उनीहरू तल्लो तलामा खसेका थिए । भत्किएको भित्ताले मुख र टाउको च्याप्पिदा निसास्सिएर मृत्यु भएको हुनसक्ने घटनास्थल पुगेका सल्यानका प्रहरी प्रमुख डिएसपी वीरेन्द्रबहादुर शाहीले बताउनु भयो । घटना भएको घर जंगलको छेउमा एक्लै रहेको र समयमै खबर आउन नसक्दा उद्धार हुन नसकेको स्थानीयको भनाइ छ ।

चिच्याइरहेको भाइ पनि बचाउन सकिनँ : सुनिता

‘हामी सबै जना रातपर्ने बित्तिकै सुतिसकेका थियौँ । म त मस्त निद्रामा थिए, थाहा पाउँदा मेरो टाउको र चिउँडोमा चोट लागेको रहेछ । पछि थाहा पाएँ हाम्रो घरको दलिन भत्किएको रहेछ । बिउझिने बित्तिकै भाइ चिच्याइरहेको सुनें। दिदी मलाई बचाउनुस भनेर बेस्सरी भाइ कराइरहेको रहेछ ।

त्यसपछि मैले आमाबुबालाई बोलाएँ, तर कोही पनि बोल्नुभएन । नबोलेपछि मलाई लाग्यो बिहान भइसकेको रहेछ । सदाझै बुबाआमा बिहानै उठेर घाँस दाउरा गर्न गइसक्नुभएको होला र नबोल्नुभएको होलाजस्तो लाग्यो ।

म भाइ कराएको ठाउँतिर गएँ । भाइ भत्किएको भग्नावशेषमा च्याप्पिएको रहेछ । निकाल्न खोजेँ तर सकिनँ । जताततै अध्याँरो थियो । नजिकैबाट हँसिया र कुटोले माटो कोट्याएर भाइलाई निकाल्न प्रयास गरेँ, तर सकिनँ । भाइ निकै चिच्याइरहेको थियो । धेरै प्रयास गर्दा पनि निकाल्न नसकेपछि म हाम्रो घरबाट १५ मिनेटको दुरीमा रहेको हजुरबुबाको घर दौडेर गएँ र सबैलाई बोलाएर ल्याएँ । पछि हेर्दा त आमा बुबा र बहिनीहरूसमेत पुरिएर मरिसकेका रहेछन् ।’

साथीकोमा सुत्न जाँदा बचे

पुरिएर पाँच जनाको ज्यान गए पनि माइँली छोरी १३ वर्षीया कमला र साइँली छोरी १० वर्षीया पुतला भने बाँच्न सफल भए । उनीहरू मंगलबार बेलुकी नै साथीको घरमा सुत्न भनेर गएका कारण बाँच्न सफल भएका हुन् । माइँली छोरी पुतलाले भनिन् ‘हामी साथीको घरमा सुत्न भनेर गएका थियौँ, राती एक्कासी घर भत्किएर भाइ च्याप्पिएको खबर सुनेपछि घरमा आएका हौँ ।’

अभिभावकसहित दुई दिदीबहिनी र एक भाइ गुमाएर निक्कै भावविह्वल भएकी पुतलाले भनिन्, ‘घरको दलान पहिले पनि सामान्य हिँड्दासमेत हल्लिने गरेको थियो । घर पुरानो छ भनेर बुबाले भन्नु त हुन्थ्यो तर हामीसँग पैसा थिएन ।’ यसैबीच, घटनास्थल पुगेका प्रमुख जिल्ला अघिकारी कमलराज ढकाल, वागचौर नगरपालिकाका मेयर लोकमान बुढाथोकी, जिल्ला प्रहरी प्रमुख वीरेन्द्रबहादुर शाहीले पीडित परिवारको लागि सहयोग हस्तान्तरण गर्नुभयो ।

प्रजिअ ढकालले पीडित परिवारका लागि राहत र किरिया खर्चबापत एक लाख सहयोग रकम मृतक रामलाल विकका बुबा देवीलाल विकलाई हस्तान्तरण गरे ।

यस्तै बागचौर नगरपालिकाका मेयर लोकमान बुढाथोकीले नगरपालिकाले पनि पीडित परिवारलाई राहत सहयोग गर्ने बताउनु भयो । उनले पीडित परिवारमा बाँच्न सफल १३ वर्षीया कमला, १० वर्षीया पुतला र नौ वर्षीया सुनिताको पालनपोषण र शिक्षादीक्षाको लागि नगरपालिकाले आवश्यक सहयोग गर्ने वचनवद्धता प्रकट गर्नुभयो ।