प्रदेस नं. ३ को नाम ‘नेवाः ताम्सालिङ्ग’ र सरकारी भाषा तामाङ र नेपालभाषा राख्न माग

Posted on: August 29, 2018 | views: 263

१३ भदौ, नुवाकोट ।
तीन नम्बर प्रदेशको नाम ‘नेवाः ताम्सालिङ्ग’ र सरकारी भाषा तामाङ र नेपाल भाषा हुनुपर्ने माग गर्दै बुधबार नुवाकोटका प्रमुख जिल्ला अधिकारी मार्फत प्रदेश नं. ३ मुख्य मन्त्रीलाई ज्ञापन पत्र बुझाइएको छ । नेवार, तामाङ, लगायत आदिवासी जनजाती समुदायको ऐतिहासिक बस्ति र प्रदेसमा समुदायगत, भाषिक, साँस्कृतिक अबस्थालाई निरन्तरता दिन माग गर्दै नेवाः ताम्सालिङ्ग समन्वय समिति नुवाकोटले मुख्य मन्त्री डोरमणी पौडेललाई ज्ञापन पत्र बुझाइएको हो ।


प्रदेशको नाम नेवाः ताम्सालिङ्ग राख्दा द्वन्द पनि मेटिने, पहिचान पनि भेटिने र बहुपहिचानको नाराले समेत सार्थकता पाउने दाबी नेपाल तामाङ घेदुङका जिल्ला अध्यक्ष एवम् नेवा ताम्सालिङ्ग समन्वय समितिका अध्यक्ष जयमान वाइवाले बताउनुभएको छ ।
नेवाः ताम्सालिङ्ग नामाकरणले पिछडिएका समुदायलाई शसक्तिकरण गर्न सहज र  मुलुकको आर्थिक समृद्धिका लागि उत्पीडित एवं पिछडिएका जनतासँगको भाबनात्मक सम्बन्ध बलियो हुने तामाङले बताउनुभएको छ । उहाँको अनुसार ज्ञापन पत्र मार्फत आदिवासी जनजातीको सन्दर्भमा उनीहरुको स्वशासन, आत्मनिर्णयको अधिकार, जल, जमिन र जंगल माथीको प्राथमिक अधिकार, प्राकृतिक श्रोत साधन माथीको अधिकार, उद्योगधन्दा, परियोजनाको कार्यान्ययनलाई सम्बोधन गर्न प्रदेश सरकारलाई ज्ञापनपत्र बुझाइएको छ ।
सरकारी बोलचालीको भाषा प्रदेशका बाहुल्य समुदायहरुले बोल्ने नेपाल भाषा र तामाङ भाषा कायम गर्न नेवाः ताम्सालिङ्ग समन्वय समितिले बुझाएको ज्ञापन पत्रमा उल्लेख गरिएको छ ।


प्रदेशमा रहेका शैक्षिक सँस्थामा आदिवासी समुदायले बोल्ने मातृभाषा शिक्षालाई पाठ्यक्रममा अनिवार्य रुपमा समावेश गर्न माग गरिएको नेवाः देय् दबुका सह संयोजक  रामप्रसाद जोशीले बताउनुभएको छ । मातृ भाषा राष्ट्रको सम्पती भएकोले कामकाजको भाषाको रुपमा तामाङ र नेपाल भाषा उपयोगी हुने भन्दै उहाँले प्रदेश सरकार मार्फत आदिवासी जनजातीको भाषिक, सामाजिक एवं साँस्कृतिक अधिकारलाई संरक्षण र प्रवद्र्धन गर्न प्रमुख जिल्ला अधिकारी उद्धबहादुर थापा मार्फत प्रदे सरकारको ध्यानाकर्षण गराउनुभएको छ । 
नेवाः ताम्सालिङ्ग समन्वय समितिले बुझाएको ज्ञापन पत्र प्रदेस सरकारको लागी त्यसको सम्बोधन समेत त्यहाँबाट नै हुने भएकाले छिटो माध्यमबाट पठाइदिने बताउनुभएको छ ।

प्रदेस नं. ३ को नाम, राजधानी सरकारी बोलिचालीको भाषा निर्धारणको लागी भइरहेको अन्योललाई अन्त्य गर्न भन्दै यसभित्र पर्ने १३ वटै जिल्लामा रहेको तामाङहरुकोे छाता सँस्था नेपाल घेदुङ र नेवार समुदायको छाता सँस्था नेवाः देय् दबूले सयुक्त रुपमा सयुक्त रुपमा नेवाः ताम्सालिङ समन्वय समिति गठन गरी आफ्ना माग पूरा गर्न चरणबद्ध रुपमा दबाब दिदै आएको छ ।


सबै जिल्लामा समिति गठन गरी दबाबमूलक कार्यक्रम अन्तरगत  बुधबार प्रदेस भित्रका सबै १३ वटा जिल्लाबाट प्रदेस सरकारलाई ज्ञापन पत्र बुझाएको समितिका केन्द्रीय प्रतिनिधि सुरेन शाक्यले जानकारी दिनुभएको छ ।