पौडेल समूहले देउवालाई अफ्ठ्यारो बनाउने,यसरी हुँदैछ भित्रभित्रै तयारी

Posted on: June 10, 2018 | views: 224

काठमाडौं । आगामी ५, ६ र ७ असारका लागि हेटौंडामा डाकिएको कांग्रेस जिल्ला सभापतिहरूको भेलामा संस्थापन पक्ष र संस्थापनतर पक्ष विभाजित हुने देखिएको छ । पार्टीको संस्थापन पक्षले जिल्ला सभापतिहरूको भेलामार्फत पार्टीको तल्लो तहको वर्तमान अवस्था बुझ्ने र नयाँ संरचनाअनुसारको संगठन निर्माणमा राय लिने बताइरहेका बेला संस्थापनइतर समूह भने फरक रूपमा प्रस्तुत हुन लागेको हो । राजधानी दैनिकले समाचार छापेको छ ।

पार्टी सभापति शेरबहादुर देउवाले भेलामा पार्टीको विधान संशोधनका लागि जिल्ला सभापतिहरूमार्फत राय लिन चाहेका छन् । तर, वरिष्ठ नेता रामचन्द्र पौडेल पक्षीय नेताहरू भने विधान संशोधनका विषयसँगै सम्पन्न निर्वाचनमा भएको अप्रत्याशित हारको विषयलाई समेत जिल्ला सभापतिहरूमार्फत उठाउने तयारीमा छन् । संस्थापनइतर समूहका मानिने नेता नवीन्द्रराज जोशीले भेलामा विधान संशोधन, सांगठनिक बनावट र निर्वाचनको पराजयका विषयमा छलफल हुने बताए ।

‘संविधानले व्यवस्था गरेअनुसार पार्टीको विधान परिमार्जनसहित सांगठनिक बनावट र निर्वाचनमा पार्टीले भोगेको पराजयको गम्भीर समीक्षा बैठकमा हुन्छ,’ नेता जोशीले राजधानीसँग भने ।

तर, संस्थापन निकट मानिने कांग्रेस संसदीय दलका मुख्य सचेतक बालकृष्ण खाँडले भने सभापतिहरूको भेला विधान संशोधन, संगठन सुदृढीकरण र समसामयिक राजनीतिका विषयमा केन्द्रित हुने बताए । उनले निर्वाचन समीक्षामा भने बैठक प्रवेश नगर्ने जानकारी दिए ।

‘निर्वाचन समीक्षाबारे केन्द्रीय समितिमा छलफल भइसकेको छ, हरेक तहमा छलफल गरेर कुनै परिणाम आउँदैन । त्यो आवश्यक पनि छैन, सभापतिहरूले आफ्नो जिल्लामा समीक्षा गरेर प्रतिवेदन भने ल्याउन सक्नुहुनेछ,’ नेता खाँडले भने ।

कांग्रेस बर्दियाका सभापति सञ्जय गौतमले भने पार्टीलाई विधिसंगत तरिकाबाट चलाउन जिल्ला सभापतिहरूले भेलामार्फत दबाब दिने बताए । ‘पार्टी नेतृत्व विधिबाट चल्नुपर्छ । यहाँ विधिविधानलाई लत्याउने काम भइरहेको छ । भेलामार्फत विधिविधानमा टेक्न नेतृत्वलाई दबाब दिन्छौं र निर्वाचनमा भएको हारको कारण माग्छौं,’ बर्दिया सभापति गौतमले भने ।

पर्साका सभापति अजय द्विवेदीले भने भेलामा निर्वाचनको हारको विषयमा पुनः समीक्षा दोहा¥याउनु आवश्यक नभएको बताए । उनले निर्वाचनमा भएको हारलाई पृष्ठभूमिमा पाठका रूपमा लिँदै अघि बढ्नुपर्ने बेला पुनः कुनै नेतामाथि दोष थोपर्नु र आरोपप्रत्यारोपमा उत्रिनुको औचित्य नभएको बताए ।

‘हारको समीक्षा केन्द्रीय समितिबाट भइसकेको छ, अब हारलाई पृष्ठभूमिमा पाठका रूपमा लिएर अघि बढ्नुपर्छ । फेरि कुनै नेतामाथि दोष थोपरेर आरोप प्रत्यारोपमा लाग्नु जायज हुँदैन । सबै मिलेर पार्टीलाई एक ढिक्का बनाएर लैजानु आजको आवश्यकता हो । त्यतातर्फ भेला केन्द्रित हुनु आवश्यक छ,’ द्विवेदीले भने ।

कांग्रेस प्रवक्ता विश्वप्रकाश शर्माले जिल्ला सभापतिहरूको भेलामार्फत पार्टीको सांगठनिक संरचनाका विषयमा व्यापक छलफल गर्ने जानकारी दिए । उनले भेलाले पार्टीको आगामी दिशाबारे जिल्ला सभापतिहरूको राय लिने र त्यहीअनुसार नेतृत्वले पार्टीको भावी कार्यदिशा तय गर्ने समेत बताए ।

प्रवक्ता शर्माले जिल्ला सभापतिको भेलामा पार्टीमाथि आइपरेको वर्तमान चुनौतीलाई एक ढिक्का भएर कसरी सामना गर्ने भन्ने विषयमा नेतृत्व केन्द्रित रहने र बैठकमा आवश्यकतातर्फ मात्रै बहस हुने प्रवक्ता शर्माले जानकारी दिए ।