विप्लव माओवादीबाट जनप्रतिनिधिको राजीनामा माग

Posted on: March 20, 2018 | views: 296

जगदिश खनाल
६ चैत, नुवाकोट । विप्लव नेतृत्वको नेपाल कम्युनिष्ट पार्टीले यहाँका जननिर्वाचित प्रतिनिधिको राजीनामा माग गरेका छन् ।
जिल्ला जनपरिषद नुवाकोटका प्रमुख बिन्तोस सिलवालले हस्ताक्षर गरेको पत्र निर्वाचित प्रतिनिधिलाई पठाएर राजीनामा दिन दबाब दिएको हो । परिषद् नेकपाको भातृ सँस्था हो ।
निर्वाचित प्रतिनिधिको राजीनामा माग गर्दै ककनी गाँउपालिका र विदुर नगरपालिकामा पत्र पठाइसकेकाले अन्य स्थानीयतहमा पनि पठाउने क्रममा रहेको सिलवालले बताउनुभयो ।
विभिन्न हतकण्डा अपनाएर जबरजस्ती सम्पन्न गरिएको निर्वाचन अमान्य हुने भन्दै परिषद्ले स्थानीयतहका प्रमुख, उपप्रमुख र वडाअध्यक्षहरुको राजीनामा माग सहितको धम्कीयुक्त पत्र पठाएको छ ।
राजीनामा माग गरिएको पत्रमा “संसदीय सत्ताको प्रतिनिधि बनेर जनताको नजरमा कलंकित बन्नुको सट्टा आफ्नो पदीय ओहदाबाट राजीनामा दिई जनपरिषद्लाई बैकल्पिक जनसत्ताको रुपमा स्वीकार गरी जनसेवा र राष्ट्र निर्माणमा सहयोग गर्न आग्रह गरिन्छ” भन्ने उल्लेख छ । “राजीनामा नदिए बर्गसङ्घर्षको निशाना बनी निस्कने परिणामको जिम्मेवारी स्वंय हुनुपर्ने” चेतावनी पत्रमा उल्लेख गरिएको छ ।
यहाँका केही स्थानीयतहका प्रतिनिधिलाई राजीनामा दिन दबाब सहितको पत्र आएको जानकारी पाएकाले नआत्तिन आग्रह गरेको जिल्ला प्रहरी प्रमुख बसन्त कुंवरले बताउनुयो ।
–––