एकीकरण बहसले वैद्य नेतृत्वको माओवादी पुनःविभाजनको संघारमा

Posted on: May 03, 2016 | views: 206

काठमाडौं,चैत २२ । मोहन वैद्य नेतृत्वको नेकपा क्रान्तिकारी माओवादीभित्र एमाओवादीसित पार्टी एकीकरण गर्ने बहसले  पुनः विभाजनको संघारमा पुगेको छ । पार्टी अध्यक्ष मोहन वैद्यले एकताको पक्षमा ठोस निर्णय नलिए महासचिव रामबहादुर थापा बादलको नेतृत्वमा बहुमत केन्द्रीय सदस्यले एकताको बाटो समात्ने तयारी गरेसँगै वैद्य माओवादी फुट नजि पुगेको हो । 

बैठकभित्रै यसबारे विवाद भएपछि वैद्यले आइतबार दुई दिन बैठक स्थगित गरेका छन् । गत चैत्र १२ गतेदेखि जारी केन्द्रीय समिति वैठकमा एकतालाई आधार बनाएर अध्यक्ष वैद्य, महासचिव थापाले भिन्दा–भिन्दै प्रस्ताव पेश गरेका छन् । त्यसबाहेक कुलबहादुर केसी र लेखनाथ न्यौपानेले पनि आफ्नो प्रस्ताव छलफलका लागि भन्दै केन्द्रीय कार्यलयमा दर्ता गराएका छन् । 

प्रस्तावमाथि केन्द्रीय सदस्यहरुको बोल्नेक्रम चैत्र २१ गते सकिएको छ । अव शीर्ष नेताहरुवीच दुई दिन छलफल भएपछि पुन २४ गते केन्द्रीय समिति वैठक बस्नेछ ।