जाजरकोट, खोटाङ, धनकुटा र रौतहटको लागि जापानद्धारा एम्बुलेन्स सहयोग

Posted on: July 06, 2017 | views: 200

काठमाडौं ।

जापान सरकारले नेपाल रेडक्रस सोसाइटी माफर्तत चार जिल्लाको लागि एम्बुलेन्स उपलब्ध गराएको छ ।


जापानी राजदूतावास काठमाडौंले जाजरकोट, खोटाङ, धनकुटा र रौतहटको लागि चार वटा एम्बुलेन्स सहयोग प्रदान गरेको छ ।


चार जिल्लाको ग्रामीण स्वास्थ्य सेवा सुधारका लागि जापानी दूतावासले एम्बुलेन्स हस्तान्तरण गरेको हो ।


सन् २०१६ को नोभेम्बर महिनामा पनि सोसाइटीलाई जापानी दूतावासले प्युठान, गुल्मी, उदयपुर र मोरङका लागि चार वटाएम्बुलेन्स हस्तान्तरण गरेको थियो ।


ती एम्बुलेन्स सोसाइटीले आफ्ना जिल्ला शाखामार्फत व्यवस्थापन गरी मानवीय सेवाअन्तर्गत बिरामी, औषधि र रगत क्षेत्रमा सञ्चालनमा ल्याउने बताएको छ ।


रेडक्रस सोसाइटीको केन्द्रीय कार्यलयमा बुधबार आयोजित कार्यक्रममा नेपालका लागि जापानी राजदूत मासासी ओगावाले सोसाइटीका अध्यक्ष सञ्जीव थापालाई चार एम्बुलेन्सको साँचो बुझाएर हस्तान्तरण गरेका गरेका हुन् ।


सोही कार्यक्रममा सोसाइटीका अध्यक्ष थापाले सम्बन्धित जिल्ला शाखाका अध्यक्षहरुलाई एम्बुलेन्सको साँचो हस्तान्तरण गरेका थिए ।


जापानी राजदूत ओगावाले ग्रामीण विपन्न क्षेत्रका जनताको स्वास्थ्य सुधार गर्न एम्बुलेन्सले सहयोग पुग्ने बताउँदै मानवीय सेवाका क्षेत्रमा सोसाइटीलाई आगामी दिनमा पनि आवश्यक थप सहयोग गर्ने बताए ।