जापान प्रहरीको हिरासतमा एक नेपालीको मृत्यु, बाजुराका अर्जुनको टोकियोमा निधन

Posted on: March 16, 2017 | views: 26933

टोकियो ।
जापान प्रहरीको हिरासतमा रहेका एक नेपालीको निधन भएको छ ।

अरुको नाममा रहेको क्रेडिट कार्ड बोकेको भेटेपछि नियन्त्रणमा लिएका ३९ बर्षीय नेपाली पुरुषको निधन भएको हो ।

हालसम्म नाम नखुलाइएका उनको अरुको बैंक कार्ड बोकेको पाइएपछि अनुसन्धानका लागि जापान प्रहरीले नियन्त्रणमा लिएकोमा प्रहरी नियन्त्रणमै निधन भएको जापानी समाचार संस्था एनएचकेले उल्लेख गरेको छ ।

समाचारमा अरुको क्रेडिट कार्ड बोकेको पाइएपछि प्रयोग गरे नगरेको बारे अनुसन्धान र कारवाहीको लागि यही मार्च १५ तारीक टोकियो जिल्ला प्रोसिक्युटरको कार्यालय पठाएको थियो ।

प्रहरीले सोधपुछका क्रममा केरकार गर्दा (नेपालमा केरकार गर्दा प्रहरीले सामान्य कुटपीट सहित सत्य बकाउन धम्की र यातना समेत दिने गर्छन्) उनी बेहोस भएको र अस्पताल लगिएका उनको अस्पतालमै निधन भएको समाचारमा बताइएको छ ।

मृतक व्यक्तिको स्पष्ट पहिचान नखुलेको भन्दै एनएचकेले समाचारमा मृतकको नाम भने उल्लेख गरेको छैन ।

तर समाचारमा उनलाई नियन्त्रणमा लिने क्रममा उनले प्रहरीबाट बच्न खोज्दा प्रहरीले उनलाई सडकमै थिचेर जर्वजस्ती नियन्त्रणमा लिंएको उल्लेख गरेको छ ।




प्रहरीलाई उदृत गर्दै एनएचकेले लेखेको समाचार आधारमा नाम नखुलाइएका ती नेपाली प्रहरीले पक्राउ गर्दा थिच्ने क्रममै बेहोस भएको वा प्रहरी केरकारमा कुटपीट वा यातनाबाट बेहोस भएको अनुमान गरिएको छ ।

यद्यपी उनको निधन र जापान प्रहरीको आधिकारीक धारणा नआइसकेकाले घटनाको पूर्ण विवरण र अनुमान लगाउन कठिन देखिएको छ ।

समाचारमा मृत्यु भएका नेपालीबारे नेपाल पक्ष नेपाली राजदूतावासमा जानकारी गराइएको बारे केही उल्लेख गरेको छैन ।

प्रहरी कस्टडीमा शंकास्पद रुपमा निधन भएका नेपालीबारे नेपाली राजदूतावासले जानकारी लिएर घटनाका बारेमा गैर आवासिय नेपाली संघ एनआरएन जापान सहित प्रतिनिधिमुलक संघसंस्थाहरुको सहकार्यमा विस्तृत विवरण बुझ्नु पर्ने देखिन्छ ।

यस घटनामा गम्भिरता पूर्वक चासो दिंदै सत्यतथ्य बाहिर ल्याएर पिडित परिवारजनमा न्याय अनुभुती तथा राहत र प्रवासमा नेपालीहरुमाथि आफ्नै सामान्य असावधानीमा हुने यस्ता गम्भिर घटनाबाट जोगाउन पहलकदमीको आवश्यकता देखिन गएको छ ।
साथै आफुसंग सम्बन्धित वाहेक कागजातहरु, आफ्नो वाहेक अरुका क्रेडिट कार्ड वा वैंककार्ड साथमा बोकेर नहिड्न र प्रयोग नगर्न समेत जापानमा रहनुभएका सबै नेपालीमा अनुरोध गर्दछौं ।

यसैबिच बाजुराका अर्जुन बहादुर सिंहको टोकियोमा निधन भएको छ ।

बुधबार जापान प्रहरीले सिंहलाई अस्पताल लैजाने क्रममा मृत्यु भएको जानकारी नेपाली दुतावासलाई दिएको बताइएको छ ।

सिंहको मृत शरीर पोस्टमार्टमका लागि टोकियोको कान्दा स्थित निहोन युनिभर्सिटी अस्पतालमा राखिएको छ ।

सिंह ६ वर्ष अघि कुक भिषामा जापान आएका हुन् । दुई वर्षअघि सिंह मस्तिष्कमा म्यानिन्जाइटिस र क्षयरोगले ग्रस्त भएपछि टोकियोको मेट्रोपोलिसन तामा मेडिकल सेन्टरमा उपचार गरेका थिए ।

सिंहले कियोसे सिटीको ताकेओका स्थित टोक्यो अस्पतालमा पनि उपचार गरेका थिए ।

दुई बर्षअघि सिंहलाई नेपाली दुतावास, एनआरएनए जापान सहित विभिन्न संघसंस्था र व्यक्तिले सहयोग गरेका थिए ।

केही समय देखि सिंह काम र बस्ने ठाउ बिहीनभई बिचल्लीमा जिवन बिताइरहेका बताइएका सिंहको नेपालमा श्रीमती र दुई छोरीहरू रहेको बुझिएको छ ।

प्रहरी कस्टडीमा मारिएका र अर्जुन एकै भएको आशंका

जापान प्रहरीले नियन्त्रणमा लिने क्रममा एक नेपालीको निधन तथा अस्पताल लाने क्रममा निधन भएको भनि एक नेपालीको समाचार आएको छ ।

दोस्रो समाचारमा अर्जुन बहादुर सिंहको नाम खुलेको छ भने पहिलोमा नाम खुलेको छैन । यस्तै पहिलो समाचारमा उमेर ३९ बर्ष भनिएको छ भने निधन भएका बाजुराका सिंह ३९ बर्षभन्दा बढीको भएको ठानिएको छ ।

तर प्रहरीले अस्पताल लैजाने क्रममा निधन भएको भनि नेपाली दूतावासलाई दिएको खवर एवं सोही दिन उस्तै प्रकृतिको घटनामा सिंहको निधनले मृत्यु भएका भनिएका व्यक्ति एकै भएको हुनसक्ने देखिन आएको छ ।

निधन भएका अर्जुन बहादुर सिंहको पुष्टि भएपनि पहिलो घटनाका बारेमा विस्तृत विवरण आइसकेको छैन ।

त्यसैले दोस्रो घटनामा निधन भएका अर्जुन बहादुर सिंहको निधनमा जापानमा रहेका नेपाली तथा संघसंस्थाले रकम संकलन गरेर दाह संस्कार गरिहाल्न लाग्नुभन्दा पनि दुवै व्यक्ति एक भए नभएको तथा प्रहरी नियन्त्रणमा रहेका नेपाली मारिनु गम्भिर प्रकृतिको घटना भएकाले यसको अनुसन्धान तथा पोष्टमार्टममा लाग्नुपर्ने र दूतावासले यसमा विशेष पहलकदमी लिनुपर्ने देखिएको छ ।

जापानी मिडिया र प्रहरीले निधन भनेका व्यक्ति अर्जुनबहादुर सिंह नै हुन् : कावा राजदूत अर्याल