जापानमा विद्यार्थीले काम गर्न पाउने समय बढेर हप्तामा ३६ घण्टा

Posted on: February 25, 2017 | views: 36831

टोकियो ।
जापानको क्युस्यु क्षेत्रमा विद्यार्थीहरुले हप्तामा गर्न पाउने कामको समय बढाएर ३६ घण्टा पुर्याइएको छ ।

क्युस्यु क्षेत्र अन्र्तगत क्युस्यु, ओकिनावा, योमागुजी लगायत ९ स्थानमा विदेशी विद्यार्थीहरुले हप्ताको २८ घण्टा काम गर्न पाउने समय बढाएर ३६ घण्टा पुर्याइएको हो ।

जापानको निशिनिप्पोन अनलाईनले जापानी अधिकारीहरुलाई उदृत गर्दै उल्लेख गरे अनुसार ९ प्रान्तमा लागु हुने यो नियम अन्तिम चरणमा रहेको र छिट्टै लागु गर्ने तयारी भइरहेको छ ।

जापानमा अध्ययनरत विदेशी विद्यार्थीहरुले कलेज शुल्क तथा खर्च र कमाई गर्न समेत हाल तोकिएको २८ घण्टाबाट संभव नदेखिएपछि नयाँ नियम ल्याइएको बताइएको छ ।
यसैगरि स्थानिय उद्योग र कम्पनीहरुले समेत कामदार समस्या झेलिरहेको अवस्थामा लागु हुन लागेको नयाँ नियमपछि विद्यार्थी र स्थायिन उद्योग तथा कम्पनी लाभान्वित हुने ठानिएको छ ।

कामदार अभाव झेलिरहेका कम्पनीहरुको समस्या तथा विद्यार्थीहरुको समस्या र क्युस्यु क्षेत्रमा घट्दो जापानी नागरिकको बसोबासलाई ध्यान दिएर क्युस्यु प्रान्तले छुट्टै यो नियम लागु गर्न लागेको हो ।

क्युस्यु प्रान्त बाहेक जापानको अन्य ठाउँमा भने हप्ताको २८ घण्टा मात्र काम गर्न पाइनेछ । यद्यपी प्रस्ताव पारित चरणमा रहेकाले लागु नभै सकेको अवस्थामा हाल भने क्युस्यु क्षेत्रमा पनि हप्ताको २८ घण्टा मात्र काम गर्न पाइन्छ ।

नयाँ नियम लागु भएपछि विद्यार्थीहरुले पुन हप्ताको ३६ घण्टा काम गर्न पाउने श्रम स्विकृत लिनुपर्नेहुन्छ ।

जापानमा विदेशी विद्यार्थी तथा डिपेन्डेन्ट भिषामा रहेकाले हप्तामा गर्न पाउने कामको समय न्युन रहेको भन्ने गुनासो र उनिहरुले तोकिएको भन्दा बढी काम गरिरहेको पाइएपछि जापान सरकारले जापानमा बढ्दो कामदार मागलाई मध्यनजर गर्दै नयाँ नियमको तयारी गरिरहेको बताइदै आएको छ ।
तर यस बारेमा भने केही जानकारी बाहिर आइसकेको छैन ।