पोखरावासीलाई खानेपानिमा साँडे ४ अर्ब अनुदान पछि जापानी राजदूतको भाषण

Posted on: February 16, 2017 | views: 419

टोकियो ।
जापान सरकारले पोखराको लागि खानेपानी आपुर्ति सुधार परियोजनाको लागि ४ अर्ब ५३ करोड ९० लाख रुपैयाँ अनुदान गर्ने भएको छ ।

अर्थमन्त्रालयद्धारा आयोजित कार्यक्रममा नेपालका लागि जापानका राजदुत माशासी ओगावा तथा नेपालका अर्थ सचिव डा।शान्तराज सुवेदीले यस्तो सम्झौता पत्रमा हस्ताक्षर गरेका छन् ।

बुधवार भएको सम्झौतापछि अर्थ सचिव सुवेदीले जापान नेपालको मुख्य विकास साझेदार भएको स्मरण गराउँदै खानेपानी जस्ता जनतासँग प्रत्यक्ष सम्बन्धित विषयमा आगामी दिनमा पनि सहयोग निरन्तर रहने विश्वास व्यक्त गरे ।

उक्त परियोजना कार्यान्वयनका लागि जापानले उपलब्ध गराउने अनुदान सम्झौतामा अर्थ मन्त्रालयका अन्तर्राष्ट्रिय आर्थिक सहायता समन्वय महाशाखा प्रमुख बैकुण्ठ अर्यालले सम्झौता गरेका थिए ।

सन् २०२२ मा सम्पन्न हुने उक्त परियोजनापछि प्रतिदिन  ४० करोड २० लाख लिटर पानी वितरण हुने लक्ष्य राखिएको छ । परियोजनापछि पोखरामा रहेका करिव पाँच लाख नागरिक लाभान्वित हुने ठानिएको छ ।


नेपालका लागि जापानी राजदूत ओगावाले परियोजनाबाट पोखराका जनताले सहज रुपमा स्वच्छ पानी पिउन पाउने विश्वास लिएको बताए ।

उनले नेपालमा राजनीतिक स्थायीत्व आउन लागेकाले अब विकासको लहर सुरु हुने बताए ।

अर्थ मन्त्रालयमा बुधबार आयोजित सम्झौता हस्ताक्षर कार्यक्रममा राजदुत ओगावाले नेपालको आर्थिक विकासका लागि जापानले विना शर्त र स्वार्थ काम गरिरहेको बताए ।

राजदूत ओगावाले जापानी लगानीका परियोजनाहरु कार्यान्वयनका लागि नेपाल सरकारले तादरुकता देखाउनुपर्ने बताउँदै आर्थिक विकासका लागि जापानबाट नेपालले धेरै पाठ सिक्न सक्ने बिचार राखे ।

नेपालको दिगो विकासका लागि यहाँको प्रकृतिक स्रोत साधनलाई उचित ढंगले प्रयोग गर्न सक्नुपर्नेमा उनले जोड दिए ।

यस अघि गत महिना पनि जापान सरकारले नागढुंगा सुरुङ मार्गका लागि अनुदान सहयोग गरेको थियो ।