सिफारिस गरेकाले मात्र बढी काम गर्न पाउने बनाउन जापानी विद्यालयको माग

Posted on: February 04, 2017 | views: 521

टोकियो ।
जापानी भाषा विद्यालयहरुले आफुले सिफारिस गरेका विद्यार्थीहरुलाई मात्र हप्तामा बढी काम गर्ने अनुमति दिन आग्रह सहितको सुझाव सरकारलाई दिएका छन् ।

विद्यार्थीहरुलाई दिइदै आएको हप्ताको २८ घण्टे काम समयबारे ओकिनावा र क्युस्यु क्षेत्रका भाषा विद्यालयहरुले यस्तो सुझाव दिएका हुन् ।
 
जापानी सञ्चार माध्यमहरुले उल्लेख गरे अनुसार २८ घण्टा मात्र काम गर्ने समयलाई बढाउनुपर्ने पक्षमा देखिएपनि सबैजसो विद्यालयहरुले त्यसको लागि दायरा नियम बनाइनुपर्ने सुझाव सहितको माग राखेका छन् ।

ओकिनावा टाइम्सले त्यहाँका जापानी भाषा बिद्यालयहरु बिचमा गरेको एक सर्बेक्षणमा अधिकांश भाषा बिद्यालयहरुले बिद्यार्थीहरुको काम गर्ने समय हप्ताको ३५ घण्टा बनाउनु पर्ने सुझाब दिएको उल्लेख गरेको छ ।

सर्बेक्षणमा .८ वटा बिद्यालय सहभागी भएकामा ४ वटाले यस बिषयमा पुनर्बिचार गर्नुपर्ने धारणा राख्दै ३५ घण्टा गरिनुपर्ने बताएपनि ३ वटाले भने हालको नियममै कडाइ गर्नुपर्ने सुझाव दिएका थिए । बिद्यार्थीले बढि काम गर्दा पढाईमा ध्यान नदिने उनिहरुको धारणा थियो ।

भाषा विद्यालयका सहभागीहरुले पछिल्लो समयमा अध्ययनका लागि भन्दापनि पैसा कमाउने उदेश्यले विदेशी विद्यार्थीहरु आउनेगरेको धारणा राखेका थिए ।

ओकिनावाका भाषा बिद्यालयहरुमा ८० प्रतिशत नेपाली विद्यार्थीहरुरहेको बताइन्छ ।

ओकिनामा क्षेत्रमा २०१५ मा भाषा बिद्यालय पूरा गरेका ५ सय ३८ जना नेपाली बिद्यार्थीले थप अध्ययन गरेको, ७ जना रोजगारीमा लागेको, १ जना नेपाल फर्केको र ४ जना बेखवर बनेको जानकारी दिएका थिए । जुन तथ्यांक ९८ प्रतिशत हो ।

बिद्यार्थीहरुको काम गर्ने समयको बारेमा ओकिनावा सहित क्युस्यु क्षेत्रका प्रान्तिय सरकार तथा ब्यवसायिक संस्थाहरुमा छलफल सुरु भएको र उनीहरुले नियम परिवर्तनका लागि केन्द्रिय सरकारलाई अनुरोध गर्ने योजना बनाएको पनि समाचारमा उल्लेख छ ।
विद्यार्थीहरुलाई हप्तामा २८ घण्टा मात्र काम गर्ने समय तोकिएपनि विद्यार्थीहरुले बढी समय काम गर्ने गरेको र जापानमा कामदारको माग उच्च भएपछि यसबारेमा छलफल र बहस हुन थालेको हो ।