जापानमा २८५३ औं सोनामा ल्होछार सांस्कृतिक कार्यक्रम सहित मनाइदै

Posted on: February 03, 2017 | views: 325

टोकियो ।
वौद्ध धर्मालम्बी तथा विभिन्न जातीहरुको महान चाड सोनाम ल्होछार २८५३ को अवसरमा जापानमा सांस्कृतिक कार्यक्रमको आयोजना हुने भएको छ ।

तामाङ भाषा, कला, संस्कृति र परम्पराको संरक्षण गरौं, २८५३ औं सोनाम ल्हाछार ज्या ल्हो भव्यताका साथ मनाऔं’ भन्ने नाराका साथ
विगतका वर्ष झैं यस वर्ष पनि नेपाल तामाङ समाज जापानले जापानमा कार्यक्रम गर्ने भएको छ ।

समाजले आगामी फेब्रुअरी १९ मा विशेष सांस्कृतिक कार्यक्रमको आयोजना गर्न लागिएको जानकारी दिएको छ ।

समाजका सचिव हिमाल लामाले २८५२ औं टे प्रे ल्होलाई बिदाइ गर्दै २५५३औं ज्या ल्हो चरा वर्ग लाई स्वागत गर्दै सुख, शान्ति, समृद्धि, सुस्वास्थ्य एवं दीर्घायुको कामना गरी सोनाम ल्होसार मनाईन लागिएको बताए ।

प्रत्येक वर्ष एक एक वटा जनावरको गणना गर्दै १२ वर्षमा १२ वटा जनावरको चक्र फेरिने गर्दछ । ल्हो अथवा वर्ग फेरिनुलाई तामाङ समुदायले नयाँ वर्षको रुपमा मनाउने प्रचलन छ । यो वर्ष बाँदर वर्गलाई विदाइ गरी चरा वा ज्या वर्गलाई स्वागत गरिँदैछ ।

कार्यक्रममा नेपालका चर्चित हास्यव्यङ्ग्य कलाकार बुद्धि तामाङ 'हैट', चर्चीत गायक तथा संगीतकार चन्द्रकुमार दोङ, गायिका निर्मला घिसिङ आउने भएको जानकारी दिइएको छ ।

टोकियो स्थित इता इताबासी कुमिङ सेन्टर हलमा आयोजना हुन लागेको सांस्कृतिक कार्यक्रममा सबै जापानवासी नेपालीहरुमा उपस्थितिको लागि आयोजकले अनुरोध समेत गरेको छ ।