कुक भिषामा आएका एकको जापानमा सडकबास, १२ लाख तिरेर आएका अरुको सहयोगमा नेपाल फर्कंदै

Posted on: January 11, 2017 | views: 36659

टोकियो ।
जापानमा वेवारिस भेटिएका भनिएका एक नेपालीलाई नेपाल फर्काइने भएको छ ।

प्रवासी नेपाली मञ्च जापानले उपलब्ध गराएको जानकारी अनुसार जापानको कानगावा केनको चुरुमीबाट बेवारिसे अवस्थामा प्रहरीले फेला पारेका उनको नाम रामचन्द्र सिलवाल हो ।

चितवन जिल्ला घर भइ ४ बर्षदेखी जापानमा रहँदै आएका उनी जापान आउन तिरेको १२ लाख रुपैयाँ तिर्न नसक्दा काम र तनावले सो अवस्थामा पुगेको पाइएको छ ।

प्रवासी नेपाली मंच ओएनएफका अध्यक्ष महेन्द्र श्रेष्ठ, उपाध्यक्ष बाबुराम भण्डारी, उप-महासचिव राजेन्द्र श्रेष्ठ, योकहामा नेपाली ग्रूपका संयोजक हरि सापकोटा, फोनिज जापानका अध्यक्ष शान्त पहरी, पत्रकार रविन्द्र श्रेष्ठ लगायतको सक्रियतामा उनको उद्दार गरिएको प्राप्त जानकारीमा उल्लेख छ । उद्दार गरिएका सिलवाललाई हाल एक होटलमा राखिएको छ ।

आफ्नै फुपुको छोरी बहिनीको दर्शन नाम गरेको रेष्टुरेण्टमा आएका भनिएका सिलवाल १२ लाख रुपैयाँ तिरेर जापान आएका थिए ।

पछिल्लो पटक दशैंदेखी गान्जी नाम गरेको रेस्टुरेण्टमा काम गरेको बताएका उनी त्यसपछि तनावले यस्तो अवस्थामा पुगेको उनले बताएका छन् ।

नेपालमा माध्यमिक विद्यालयमा गणित र विज्ञान विषयमा शिक्षक रहेका सिलवाल काम नजानेपनि कुक भिषामा राम्रो आम्दानी हुने ठानेर १२ लाख रुपैयाँ खर्चेर जापान आएका थिए ।



योकहामा ग्रुपका संयोजक हरि सापकोटाका अनुसार उनले नेपाल फर्कने इच्छा राखेपछि टिकटको व्यवस्था गरिएको छ ।

सिल्वाललाई एनआरएन जापान, ओएनएफ र चितवन समाज जापान लगायत संस्थाको सहयोगमा जापानमा रहने र नेपाल फर्कर्ने व्यवस्था मिलाइएको छ ।