नेपाली खेलाडी फेरि जापानमा लुके

Posted on: December 20, 2016 | views: 964

काठमाडौं । जापानको टोकियोमा भएको ‘आठौँ एसियन सफ्ट टेनिस च्याम्पियनसिप’मा भाग लिन नेपालको प्रतिनिधित्व गरेर गएका खेलाडीहरू अवैधानिक रूपमा उतै बसेको पाइएको छ ।

खेलडीहरू मनोज सुब्बा, राज पुतुवार नगरकोटी र कृष्ण बहादुर राउत टोकियोमै लुकेर बसेको स्रोतको दाबी छ । तीनै खेलाडी विभिन्न प्रतियोगितामा भाग लिन विदेश जाँदा अवैधानिक रूपमा बस्ने गरेको बताइन्छ ।

नगरकोटी र राउत इन्चोन एसियाडमा कोरियामा लुकेर बसेर नेपाल आएका खेलाडी हुन् । सुब्बा भने सन् २००० मा जापानमा पक्राउ परेर नेपाल फर्काइएका थिए ।

सन् २००८ मा दक्षिण कोरियामा भएको इन्चन एसियाडमा भाग लिन गएका राज पुतुवार नगरकोटी, अभिषेक झा, श्याम लामा र कृष्ण बहादुर राउत पनि कोरियामै लुकेर बसेको स्रोतले जनाएको छ । सन् २००४ मा गएका मनोज सुब्बा र निर्मल स्थापित पनि उतै लुकेका थिए ।

नेपालले सन् १९९५ मा जापानको हिरोसिमामा भएको एसियाडमा खेलाडी पठाएको थियो, जसमा पुरुषको टिम इभेन्ट्समा नेपालले छैटौं स्थान प्राप्त गरेको थियो । उक्त एसियाडमा भाग लिएका खेलाडीहरु विकास पाण्डे, सञ्जय नेपाल, अच्युत श्रेष्ठ, विश्वास बस्नेत र अशोक सिंहले उत्कृष्ट ६ मा परेर डिप्लोमा सर्टिफिकेट पाएका थिए ।

सो प्रतियोगितामा गएका केही खेलाडी भने जापानमा नै लुकेर बसेका थिए । सञ्जय नेपाली, विश्वास बस्नेत, गोपीकृष्ण थापा र सरोजनी तुलाचन जापानमै लुकेर बसेको स्रोत दाबी गर्छ । यी सबै सफ्ट टेनिसका खेलाडी हुन् ।

खेलाडी पटक–पटक विदेशमा लुक्ने गरे पनि नेपाल सफ्ट टेनिस एसोसिएसनले केही कदम चालेको छैन । बरु विभिन्न राष्ट्रका दूतावासले भने राष्ट्रिय खेलकुद परिषद् र नेपाल ओलम्पिक कमिटीलाई पटक–पटक स्पष्टीकरण मागेका छन् ।

विदेशमा खेलाडी लुकेको विषयमा सफ्ट टेनिस एसोसिएसनका अध्यक्ष विनयविक्रम शाहसँग प्रतिक्रिया लिने प्रयास सफल हुन सकेन । पटक–पटक प्रयास गर्दा पनि उनी सम्पर्कमा आएनन् ।
बाह्रखरी अनलाईनमा प्रकाशित