गल्कोट समाज जापानले टोकियो, ओसाका र नागोयामा सांस्कृतिक कार्यक्रम गर्ने

Posted on: November 19, 2016 | views: 325

टोकियो ।
नेपालको कुनै क्षेत्रको आधारमा गठन गरिएको मध्ये सबैभन्दा ठूलो गल्कोट समाज जापानले राजधानी टोकियो सहित ओसाका र नागोयामा भव्य सांस्कृतिक कार्यक्रम गर्ने भएको छ ।

पूर्व घोषणा अनुसार तीन ठाउँमा सांस्कृतिक कार्यक्रम गर्न लागिएको संस्थाले बताएको छ । डिसेम्बर ३१ मा नागोयाबाट सुरु सांस्कृतिक कार्यक्रम जनवरी १ ओसाका र जनवरी २ को टोकियोमा गरिने भएको संस्थाका अध्यक्ष नरबहादुर थापाले बताउनुभयो ।

कार्यक्रमको लागि तयारी तिब्र पारिएको भन्दै कार्यक्रममा नेपालबाट लोकप्रिय कलाकारहरु ल्याउने तयारी भइरहेको समेत बताइएको छ ।

गल्कोट समाज जापानले सांगीतिक कार्यक्रमबाट संकलित रकमलाई भूकम्प प्रभावित तथा बिकट क्षेत्रमा ७ कोठे बिद्यालय भवन बनाउन खर्च गर्ने बताएको छ । साथै बाँकी रकमबाट गल्कोट क्षेत्रको पर्यटन प्रवर्द्दनका लागि खर्च गरिने भएको छ ।

गत वर्ष अयोजना गरिएको सांगीतिक कार्यक्रमबाट संकलित रकमलाई समाजले गल्कोट क्षेत्रका सम्पूर्ण गाबिसका प्राथमिक स्वास्थकेन्द्र तथा स्वास्थ चौकिहरुमा स्वास्थ उपकरण वितरण तथा निशुल्क बृहत स्वास्थ शिबिर सम्पन्न गरेको बताएको छ ।

गल्कोट समाजले जापानमा कार्यक्रम गरेर उठेको रकम र सहयोग संकलनबाटै गल्कोटमा एम्बुलेन्स समेत सहयोग गरिसकेको छ ।