जापानमा उठाएको रकम अन्तत लाप्राकमै खर्च गर्ने निर्णय

Posted on: November 05, 2016 | views: 731

टोकियो ।
भूकम्प पीडितका नाममा उठाएको पाँच करोड बढी रकम मध्ये खातामा रहेको २ करोड ३० लाख बढी रकम डेढ बर्षसम्म कहाँ खर्च गर्ने भन्ने छलफलमै बिताएको जापान एनआरएनले अन्तत गोरखा लाप्राकमा खर्च गर्ने निर्णय गरेको छ ।

डेढबर्ष वितिसक्दा समेत संकलीत रकम कहाँ खर्च गर्ने भन्ने निर्णय नगर्दा अनर्गल प्रचार हुनगई केन्द्रिय उपाध्यक्ष भवन भट्टको नाम समेत मुछिन गएको रकम एनआरएनए आइसीसीले निर्माण गर्ने लाप्राकका ६ सय घर निर्माणमा दिइने भएको बताइएको छ ।

विनाशकारी भूकम्पको केन्द्रविन्दू गोरखाको लाप्राकमा एनआरएन आइसिसीले ६ सय वटा घर बनाउने सहमती सहित परियोजना अघि बढाएको छ ।
लाप्राक गत वर्ष बैशाख १२ गते गएको महाभूकम्पको केन्द्रविन्दु हो ।

संकलीत रकम डेढ बर्षसम्म त्यसै राख्दा विभिन्न पक्षबाट यो समयमा राखिएको रकमको सदुपयोगबारेमा प्रश्न उठ्दै आएको थियो ।

एनआरएन आइसीसीका उपाध्यक्षसमेत रहेका समितिका संयोजक भवन भट्टको अध्यक्षतामा बिहीबार बसेको एनआरएन जापानको सहयोग समितिको बैठकले लाप्राक प्रोजेक्टमा सघाउने गरी मौज्दात रकम काठमाडौंस्थित एनआरएनए आइसीसी सचिवालयको खातामा पठाउने निर्णय गरेको हो ।

नेपालमा महाभूकम्प गएलगत्तै एनआरएन जापानसहित जापानमा रहेका दर्जनौ संघसंस्थाहरु सम्मिलित भूकम्प पीडित राहत तथा सहयोग समिति जापान गठन गरि रकम संकलन गरिएको थियो ।

नेपालका भूकम्प पीडितको लागि भन्दै चलेको अभियानबाट कुल ५ करोड ३० लाख १७ हजार ३४ येन संकलन भएकोमा उतिबेलानै एनआरएन आइसीसीको जिम्मामा ३ करोड येन नेपाल पठाएपनि त्यसबाट १२ प्रतिशत रकम मात्र खर्च भएपछि थप रकम नपठाएको बताइएको छ ।

पठाएको रकमबाट नेपालमा खर्च भई बाँकी रहेको रकम र जापानमा रहेको मौज्दात रकम २ करोड ३० लाख १७ हजार ३४ येन लाप्राक प्रोजेक्टमा खर्च गर्ने गरी समितिले तत्काल रकम नेपाल पठाउने भएको छ ।

यसअघि गोरखाकै कुनै स्थान वा कुनै जिल्लामा जापान भिलेजका रुपमा केही घर वा सामुदायिक भवन, विद्यालय आदि बनाउने विषयमा छलफल अघि बढाएको एनआरएन जापानले अन्तत रकम एनआरएन आइसिसिलाई नै दिने निर्णय गरेको हो ।

लाप्राक प्रोजेक्टमा जापानबाट पठाइएको रकमबाट निर्माण हुने घरहरुमा जापानबासी नेपाली समुदाय र जापानी नागरिकहरुको पहिचान उल्लेख गरिने बताइएको छ । तर त्यस्तो परिचय व्यक्ति वा संस्थाको नाम, छाप आदि के उल्लेख गर्ने, एवं सबैघरमा उल्लेख गर्ने वा सामुहिक रुपमा चिनिने गरि उल्लेख गर्नेभन्ने खुलाइएको छैन ।