अलबिदा आवेई । रहिनन् नेपालप्रेमी पहिलो महिला सगरमाथा आरोही तावेई

Posted on: October 22, 2016 | views: 609

६ कार्तिक, टोकियो ।
पहिलो महिला सागरमाथा आरोही जुन्को तावेईको ७७ वर्षको उमेरमा निधन भएको छ ।

जापानको साइटामा क्यान्सर सेन्टरमा उपचारका क्रममा तावेईको निधन भएको जापान माउन्टेनरिङ एसोसिएसनले जनाएको छ । जापानी टेलिभिजन एनएचकेले पनि तावेईको निधन भएको जनाएको छ ।


जापानको फुकुसिमामा जन्मनुभएकी तावेईले सन् १९७५ मा सर्वोच्च शिखर सगरमाथाको चुचुरोमा पाइला टेकी पहिलो महिला आरोही बन्नुभएको थियो ।


तावेईको तीन दिनअघि निधन भएपनि खवर ढिलो गरि सार्वजनिक भएको हो ।
 


जुनको तावेई गत अप्रिल ३० मा काठमाडौँमा भएको मनास्लु र ल्होत्से हिमालको हीरक महोत्सवमा सहभागी हुन जापानी आरोहीको नेतृत्व गर्दै नेपाल जानुभएको थियो ।

नेपाललाई आफ्नो दोस्रो घर बताउने तावेई सगरमाथा र नेपालका हिमालहरु जस्ता मनमोहक हिमाल कतै नभएको बताउने गर्थिन् ।

नेपालको पर्यटन र हिमाल आरोहणमा जापानमा प्रचार प्रसार र पर्यटन प्रवद्र्धन सघाउँदै आएकी तावेईको निधनपछि जापानमा रहेका नेपालीहरुले दुख व्यक्त गरेका छन् ।

तावेई जापानस्थित नेपाली राजदूतावास तथा नेपालीहरुले गरेका विशेष कार्यक्रमहरुमा समेत सहभागी हुनेगर्नुभएको थियो ।