जापान 'वर्किङ' भीसा ५ बर्ष बनाएर विदेशी कामदार बढाउँदै

Posted on: September 25, 2016 | views: 1368

९ असोज, टोकियो ।
जापानले हाल बिदेशी कामदारको लागि दिंदै आएको 'वर्किङ' भिषाको अवधि ३ बर्षबाट बढाएर ५ बर्ष पुर्याउने भएको छ ।

जापान सरकारले ल्याउन लागेको नयाँ नीति अनुसार हाल तीन बर्षको लागि दिइदै आएको वर्किङ भिषाको समय बढाएर ५ बर्ष पुर्याउन लागिएको हो ।

नयाँ नीतिमा जापानी कुनैपनि कम्पनीले चाहेजती बिदेशी कामदार राख्न पाउने नियम समेत थप्न लागिएको बताइएको छ ।

तर नेपाली कामदारहरु प्राय वर्किङ भिषामा कुकमा आउने भएका कारण यो बिषयलाई नयाँ नीतिले समेट्ने नसमेट्ने बारे भने स्पष्ट भइसकेको छैन ।

जापानका प्रधानमन्त्री शिन्जो आबेले जापान सरकारले विदेशी कामदारको संख्यामा वृद्धि गर्ने यसअघिनै बताइसकेका छन् ।

जापानमा देखा परेको जनशक्तिको अभावलाई पूर्ति गर्न आबेको सरकारले कामदारको संख्यामा बृद्ध गर्ने लागेको हो ।

प्रधानमन्त्री आबेका विशेष सल्लाहकार तथा सांसद मासाशिको शिबायामाले गत हप्ता सिंगापुको एक सञ्चारमाध्यमलाई दिएको अन्तर्वार्तामा जापानी सरकारको नयाँ योजनाबारे बताएका थिए ।

विदेशी कामदारको संख्या दोब्बर पार्ने विषयमा जापान सरकार आन्तरिक तयारीमा रहेको उनको भनाई थियो ।

जापानको श्रम बजारमा घट्दै गएको जनशक्तिको अभाव पूरा गर्न विदेशी कामदारको संख्या दोब्बर बनाउनुको विकल्प नरहेको शिवायामाले बताएका छन् ।

१ सय २७ मिलियन जनसंख्या रहेको जापानको जनसंख्या बृद्धिद्धर आरोला लागिरहेको छ । जापान सरकार कम्तीमा १ सय मिलियन अर्थात १० करोडभन्दा कम हुन नदिन जापान सरकार गम्भीर भएर लागेको बताइएको छ ।

जापान सरकारको अनुमानित तथ्यांक अनुसार हाल जापानमा १९ लाख विदेशी कामदारहरु वैधानिक रुपमा कार्यरत छन् ।