पहिलो दिनको नेपाल फेस्टिवल भव्य, आज अन्तिम दिन (फोटो फिचर)

Posted on: August 06, 2016 | views: 956

२३ साउन, टोकियो ।
नवौं नेपाल फेस्टिवलको पहिलो दिन भव्य उद्घाटन सहित दशौं हजार व्यक्तिहरुले अवलोकन गरेका छन् ।

गैर आवासिय नेपाली संघ जापानले आयोजना गरेको नेपाल फेस्टिवलको उद्घाटन जापानका लागि नेपाली कार्यवाहक राजदूत कृष्णचन्द्र अर्याल सहित जापानी परराष्ट मन्त्रालयका प्रतिनिधि आरियोसी ताकासी तथा नेपालका लागि पूर्व जापानी राजदूतहरु नाकाहासी र कोजिमाले रिवन काटेर संयुक्त रुपमा गरेका थिए ।

नेपाली पञ्चेबाजा, लाखे, धिमे नाच सहित विभिन्न झाँकी प्रस्तुत गरिएको फेस्टिवलको पहिलो दिनमा नेपाली जापानी सहित अन्य विदेशीहरुको अबेर साँझ सम्म बाक्लो उपस्थिति रहेको थियो ।

गैर आवासिय नेपाली संघका केन्द्रिय उपाध्यक्ष भवन भट्ट, एसिया प्यासिफिक संयोजक किरणविक्रम थापा, एनआरएन जापानका अध्यक्ष तथा कार्यक्रम आयोजक मूल समितिका संयोजक सुदन थापा समेतको उपस्थिति रहेको थियो ।

कार्यक्रममा कार्यवाहक नेपाली राजदूत सहित पूर्व जापानी राजदूत र जापान सरकारका प्रतिनिधिले नेपाल जापान सम्वन्ध, ६० औं कुटनीतिक सम्वन्ध सहित नेपालको विकासमा जापानले खेलिरहेको भूमिका र दुई देशका नागरिक बिच रहेको सम्वन्धका बारेमा चर्चा गर्नुभएको थियो ।

नमस्ते व्याण्डको विशेष सांगितिक प्रस्तुती, एभरेष्ट इन्टरनेशलका विद्यार्थीहरुको नृत्य, लोक भजन, नेपाली मौलिक लोक गितहरुमा एकल तथा सामुहिक नृत्य समेटिएको फेस्टिवलको मुख्य कार्यक्रम सञ्चालन एनआरएन जापानका सल्लाहकार तथा बुद्धिजिवि जिज्ञानकुमार थापाले गर्नुभएको थियो । यसैगरि विसु भण्डारीले कार्यक्रमको पछिल्लो खण्ड सञ्चालन गर्नुभएको थियो ।

नेपाली पहिरन, गित संगित, बाजा गाजा र नृत्य एवं नेपालीहरुको बाक्लो उपस्थितिले नेपालकै कुनै ठाउँमा भइरहेको मेलाको झझल्को दिने नेपाल फेस्टिवलको दोस्रो तथा अन्तिम दिन आइतबार शनिवारको तुलनामा बढी व्यक्तिको सहभागीता रहने ठानिएको छ ।

जापानीमाझ नेपालबारे जानकारी दिन, नेपालको पर्यटन प्रवद्र्धन तथा नेपाली मौलिक कला र संस्तृतिको प्रचार गर्ने मुख्य उदेश्य सहित आयोजित मेलामा जापानी सहित अन्य देशका नागरिकहरुको समेत बाक्लो उपस्थिति रहेको थियो ।

अध्ययन, रोजगारी लगायत विभिन्न रुपमा जापानमा रहेका नेपालीहरुको उल्लेख्य सहभागीता रहेको नेपाल फेस्टिवलमा आज आइतबार तथा अन्तिम दिन जापानमा रहेका नेपालीहरुको थप उत्साहजनक सहभागीता रहने ठानिएको छ ।





फोटो साभार फेसबुक:.सुदन थापा, विसु भण्डारी, चेतन पौडेल