भिमाको मुटुको सल्यक्रिया भोली, आर्थिक सहयोग नउठाउन आग्रह

Posted on: June 21, 2016 | views: 1729

७ असार, टोकियो ।
मुटुरोगी भिमाकुमारी श्रेष्ठले आफ्नो उपचारको लागि आर्थिक संकलन बन्द गर्न आग्रह गरेकी छिन् । भोली मुटुको शल्यक्रिया हुन लागेकी भिमाले आफु अहिले फोन उठाएर कुरा गर्न पनि असमर्थ रहेको बताएकी छिन् ।

विद्यार्थी विषामा आएर अध्ययनरत भिमाको मुटुमा समस्या देखिएर स्वास्थ्य परिक्षण गर्दा भल्भ फेर्नुपर्ने भएको छ ।

मुटुको भल्भ फेर्न करिव १६ लाख जापानी येन लाग्ने र आफुसँग उक्त रकम नभएको बताएपछि जापानमा रहेका विभिन्न व्यक्ति र संस्थाहरुले उनको उपचारको लागि आर्थिक संकलन र सहयोग गरिरहेका छन् ।

अहिलेसम्म गरेको सहयोग र मायाको लागि जापानबासी नेपालीहरुप्रति कृतज्ञता प्रकट गर्दै आजका मितिदेखि आर्थिक सहयोग संकलन कार्य बन्द गरिदिन सम्बन्धित सबैमा भिमाले अनुरोध गरेकी छिन ।

भिमाले संकलित रकम आफ्नो खातामा राखिदिन र आजैबाट सहयोग उठाउन बन्द गर्न आग्रह गरेकी छिन् ।

मुटुको भल्भ फेर्ने क्रममा भोली अप्रेसन तथा केही दिन सघन कक्षमा उपचार हुने भएकाले भिमाले करिव ७ दिन कसैसँग बाहिरि सम्पर्क गर्न सक्ने छैनन् ।

त्यसैले भिमाले उपचार पछि आफुलाई प्राप्त सहयोगको सबै विवरण सार्वजनिक गर्ने बताएकी छिन् । भिमाको उपचारकै लागि भनेर उनको परिवारका सदस्यहरु पनि जापान आउने तयारीमा रहेको बताइएको छ ।