जापानभर धन्यवाद सहित नेपाल भ्रमणको निम्तो बाँडीयो (फोटो फिचर/भिडियो)

Posted on: May 29, 2016 | views: 1764

गोकर्ण अधिकारी-१६ जेठ, टोकियो ।
जापानमा रहेका नेपालीहरुले जापानी नागरिकलाई भूकम्पपछि नेपाललाई गरेको सहयोगको लागि धन्यवाद सहित नेपाल भ्रमणको निम्तो दिएका छन् ।

नेपाली राजदूतावास जापानका कार्यवाहक राजदूत गहेन्द्रराज राजभण्डारी, गैर आवासिय नेपाली संघ एनआरएनका केन्द्रिय उपाध्यक्ष भवन भट्ट, एनआरएन जापानका अध्यक्ष सुदन थापा लगायत विशिष्ट व्यक्तिको विभिन्न स्थानमा उपस्थिति रहेको थियो ।

राजधानी टोकियोको सिन्जुकुमा भएको धन्यवाद ज्ञापन कार्यक्रममा कावा राजदूत राजभण्डारी, सफल व्यवसायीको रुपमा समेत परिचित भवन भट्ट सहित एनआरएन जापान अध्यक्ष सुदन थापा स्वयंले जापानी नागरिकहरुलाई नेपाललाई गरेको सहयोगको लागि धन्यवाद सहित नेपाल भ्रमणको निम्तो दिनुभएको थियो ।

धन्यवाद सहित नेपाल भ्रमणको लागि बाँडीएको निमन्त्रणा पत्र लिंदै जापानीहरुले सहयोग लिएर धन्यवाद दिन यतिठूलो कार्यक्रम आयोजना गरिएकोमा खुशी हुँदै आभार प्रकट गरेका थिए ।

जापानीहरुले धन्यवाद दिन बसेका नेपालीहरुप्रति श्रद्धाभाव व्यक्त गर्दै गत बर्षको भूकम्पपछि नेपालको अवस्थाका बारेमा समेत जिज्ञासा राखेका थिए ।

नारा वा होहल्ला बिना शान्त रुपमा उपस्थित भएर शुभकामना र नेपाल भ्रमणको निम्तो दिन अधिकाशं ठाउँमा नेपाली पोशाक सहित नेपालीहरुको उत्साहजनक सहभागीता रहेको थियो ।

दिनको ठिक ३ देखी ४ बजेसम्म आयोजित कार्यक्रम तोकिएकै समयमा सुरु भएर तोकिएकै समयमा समापन हुनुका साथै शान्तिपूर्ण र सभ्य रुपमा सफल भएको पाइएको छ ।

जापानका मुख्य शहर टोकियो, सिन्जुकु, ईकिबुकुरो सहित नागोया, गुम्बाकेन लगायत ठाउँमा भएका कार्यक्रम भव्य रुपमा सफल भएको टपनेपालन्युजडटकमलाई प्राप्त जानकारीमा उल्लेख छ । यस्तै अन्य स्थानमा भएका कार्यक्रमहरु पनि भव्य रुपमा सफल भएको एनआरएन जापानले जानकारी दिएको छ ।

जापानभर भएका कार्यक्रमको विस्तृत विवरण भने एनआरएन जापान तथा नेपाली राजदूतावासले केहीदिनपछि जानकारी गराउने बताएको छ ।