जापानी कम्पनीद्धारा नेपालमा ग्याँसमा लगानी, अब ठूलो सिलिण्डरका साथै पाइपबाटै वितरण

Posted on: November 04, 2017 | views: 515

काठमाडौं ।

खाना पकाउने एलपी ग्यासमा विदेशी लगानी भित्रिएको छ । बारास्थित एलएल ब्रान्डको ग्यास उद्योगमा जापानको ख्यातिप्राप्त ग्यास वितरक व्यापारिक संस्था साइसान कम्पनी लिमिटेडले ५१ प्रतिशत सेयर खरिद गरेको छ । साइसानले ५१ प्रतिशत सेयर किनेपछि एलएल ग्यासमा नेपाली व्यवसायी कृष्णकुमार श्रेष्ठको अब ४९ प्रतिशत सेयर रहने भएको छ ।


साइसान कम्पनीले गत साउन २१ गते एलएल ग्यास उद्योगसँग लगानीसम्बन्धी सम्झौता गरेको थियो । कम्पनीका समुद्रपार व्यापार विभागका वरिष्ठ सल्लाहकार अकिओ मुराताका अनुसार एलएल ग्यास उद्योगले नयाँ प्रविधिमा आधारित खाना पकाउने ग्यास बजारमा ल्याउनेछ ।


विदेशी लगानी भित्र्याइसकेपछि एलएलले चाँडै नै बारासहित धादिङ र पोखराको जामुनेबाट आफ्नो व्यावसायिक उत्पादन सुरु गर्नेछ। तीनवटै स्थानबाट उत्पादन गर्न सरकारबाट अनुमतिसमेत प्राप्त गरिसकेको मुराताकाको दाबी छ। उनका अनुसार तीनवटै स्थानबाट गरी पहिलो वर्ष चार हजार पाँच सय मेट्रिक टन ग्यास वितरण गर्ने लक्ष्य छ ।


दोस्रो वर्षमा भने १० हजार मेट्रिक टन ग्यास वितरण गर्ने कम्पनीको योजना छ। हाल एलएल ग्यास उद्योगसँग वार्षिक दुई हजार पाँच सय ८० मेट्रिक टनबराबरको सिलिन्डर उत्पादन गर्ने क्षमता छ भने ५० मेट्रिक टन क्षमताका दुईवटा रिफिलिङ सेन्टर छन् ।


एलएलले सुरक्षाका दृष्टिकोणले विश्वमै लोकप्रिय मानिएको प्रविधिको प्रयोग गरी खाना पकाउने सिलिन्डर उत्पादन गर्नुका साथै मध्यम र ठूला पाँचतारे होटल, अपार्टमेन्ट, हाउजिङ, अस्पताल, ठूलाठूला क्यान्टिन, पार्टी प्यालेसलगायत स्थानमा पाइपलाइनको सहयोगमा ग्यास आपूर्ति गर्ने जानकारी दिएको छ। ‘यस्ता स्थानमा हामी ठूलो क्षमताको भण्डार निर्माण गर्नेछौं, त्यसपछि प्रत्येक किचेनमा रहेका ग्यास चूलोलाई भण्डारगृहबाट पाइपलाइनमा जडान गर्नेछौ' मुराताकाले सोमबार भने, ‘यसरी पाइपलाइन जडान भइसकेपछि हाम्रो बल्क मोबाइल भ्यानले आवश्यकताका आधारमा भण्डारमा ग्यास भरिदिने सुविधा उपलब्ध गराउने योजना छ ।'


यो प्रविधि निकै सुरक्षित मानिने उनको भनाइ छ। पाइपलाइनबाट ग्यास लिकेज हुने जोखिम कम हुन्छ । ‘लिकेज भए पनि पाइपलाइनमा जडान भएको प्रविधिले आफै ग्यासको मुख्य स्वीच अफ गरिदिने भएकाले यसबाट कुनै पनि प्रकारको मानव जोखिम हुँदैन । समन्वयकर्ता सन्तोष पौडेलका अनुसार एलएल ग्यासमा लगानी भित्र्याउनुअघि साइसान कम्पनीले २०१६ को अप्रिलदेखि करिब चार महिनासम्म नेपालको ग्यासको बजार, सुरक्षा र प्रविधिबारे स्थलगत अध्ययन गरेको राजेश बर्माले अन्नपूर्णमा खवर लेखेका छन् ।


अध्ययनका क्रममा नेपालमा वार्षिक पाँचदेखि १० प्रतिशतका दरले खाना पकाउने ग्यासको माग बढ्दै गएको पाइएको थियो। त्यही अनुपातमा दुर्घटना पनि बढ्दै गएकाले नेपाली उपभोक्तालाई सुरक्षित खाना पकाउने ग्यास सुविधा उपलब्ध गराउन नेपाली कम्पनीमा लगानी गरिएको मुराताकाले जानकारी दिए ।


२०४५ सालमा स्थापित साइसान कम्पनी खाना पकाउने ग्यासको क्षेत्रमा जापानमै उत्कृष्ट मानिन्छ। यो कम्पनीले मंगोलिया, बंगलादेश, भियतनाम, कम्बोडिया,  अस्ट्रेलिया र इन्डोनेसियाको ग्यास उद्योगमा ठूलो लगानी गरेको छ ।


एलएल ग्यास यसअघि चौधरी घराना समूहले सञ्चालन गर्दै आएका थिए। त्यसपछि यसको सम्पूर्ण सेयर अर्को व्यापारिक घरानालाई बिक्री गरिएको थियो । कच्चा तेल भित्र्याउन नेपाल आयल निगमले सन् २००८ मा एलएल स्थापना गरेको थियो । 


व्यावसायिक काम गर्न नसकेपछि २०१४ मा यसलाई निजीकरण गरिएको थियो । निजीकरणपछि यो उद्योग चौधरी ग्रुपले सम्हाल्दै आएको छ ।