नेपाली कामदारलाई जापान राजेगारी सहज बनाउन ‘जिट्को’ सम्झौता परिमार्जन तयारी

Posted on: November 04, 2017 | views: 1919

काठमाडौं ।

सरकारले नेपाली कामदारलाई जापानको रोजगारी सहज बनाउने प्रयास अगाडि बढाएको छ ।

औद्योगिक तालिम तथा प्राविधिक ‘इन्टर्नसिप’ का रूपमा नेपाली कामदार जापान पठाउन यसअघि भएको दुईपक्षीय सम्झौता परिमार्जन गर्दै जापानको रोजगारी सहज बनाउन खोजिएको हो ।


जापानको श्रम बजार नेपाली कामदारका लागि सीमित आकर्षक गन्तव्यस्थलका रूपमा रहेको छ । तर, जापानको रोजगारी नेपाली कामदारका लागि त्यति सहज पहुँच भने मानिँदैन ।

विद्यमान सम्झौताअनुसार सीमित संख्यामा मात्रै जापानबाट प्रशिक्षार्थी कामदारको माग आउन सक्ने भएकाले थोरै मात्र कामदार जापान जान सक्ने अवस्था छ ।


नेपाल सरकार र जापान सरकारको अन्तर्राष्ट्रिय तालिम सहयोग निकाय ९जिट्को० बीच ३ डिसेम्बर, २००३ मा नेपाली औद्योगिक प्रशिक्षार्थी र प्राविधिक कामदारहरू जापान पठाउनेसम्बन्धी सम्झौता भएको थियो ।

जसअनुसार आर्थिक वर्ष ०६४/६५ देखि नेपाली कामदार जापान जान सुरु भएको हो । २०७४ असोज मसान्तसम्म १८ हजार ७ सय ८५ जना नेपाली कामदार श्रम स्वीकृति लिएर रोजगारीका लागि जापान गएको वैदेशिक रोजगार विभागले जनाएको छ ।


सम्झौताअनुसार सुुरुमा कामदार पठाउन नेपाल उद्योग वाणिज्य महासंघसँग साझेदारी गरिएकोमा २०६६ यता वैदेशिक रोजगार व्यवसाय सञ्चालन गर्ने अनुमतिपत्र प्राप्तमध्ये जिट्कोअन्तर्गत कामदार पठाउन सूचीकृत म्यानपावरले समेत कामदार पठाउन सक्ने व्यवस्था गरिएको छ ।

जापानको औद्योगिक श्रम बजारमा नेपाली कामदारहरूले सिकेको ज्ञान, सिप र दक्षता नेपालको आर्थिक तथा औद्योगिक विकासका लागि महत्वपूर्ण र उपयोगी हुने नेपाल उद्योग वाणिज्य महासंघकी अध्यक्ष भवानी राणा बताउँछिन् । हाल जिट्को अन्तर्गत सूचीकृत ९२ वटा म्यानपावरले नेपाली कामदार जापान पठाउने गरेका छन् ।


हाल सूचीकृत म्यानपावरहरूले जिट्कोमार्फत आवश्यक कामदारको माग ल्याउने र त्यसै आधारमा श्रम स्वीकृति लिएर प्रशिक्षार्थीका रूपमा नेपाली कामदार जापान पठाउने गरिएको छ । जसका कारण सीमित संख्यामा मात्र नेपाली कामदार रोजगारका लागि जापान जान सक्ने अवस्था छ ।


जिट्को सम्बन्धी हालको सम्झौता परिमार्जन भएमा सूचीकृत म्यानपावरहरूले जापानका उद्योग तथा प्रतिष्ठानमा आवश्यक कामदारको माग सोझै ल्याएर नेपाली कामदार जापान पठाउन सक्नेछन् । जसले गर्दा नेपाली कामदारका लागि आकर्षक रोजगार गन्तव्य मानिएको जापान जान केही सहज हुने श्रम तथा रोजगार मन्त्रालयका एक उच्च अधिकारी बताउँछन् ।


सम्झौता परिमार्जन गर्न परराष्ट्र मन्त्रालयमार्फत जापान सरकारसँग कूटनीतिक प्रयास भइरहेको छ । जसअनुसार विभिन्न चरणमा दुईपक्षीय छलफल तथा संवाद चलिरहेको र त्यस विषयमा जापानी पक्ष सकारात्मक रहेको परराष्ट्र मन्त्रालयका सहायक प्रवक्ता रामबाबु ढकालले बताए । ‘छलफलका क्रममै रहेकाले सम्झौता परिमार्जन कहिले हुन्छ, तत्काल भन्न सकिने अवस्था छैन,’ उनले भने, ‘सकेसम्म छिटो निष्कर्षमा पुग्ने मन्त्रालयको प्रयास छ ।’