जापानमा १८ बर्षीया किशोरीले खैरो कपाललाई विद्यालयले कालो पार्न लगाएपछि मुद्दा हालिन्

Posted on: October 29, 2017 | views: 449

टोकियो ।

प्राकृतिक रुपमै आफ्नो खैरो रहेको कपाललाई विद्यालयले जर्वजस्ती कालो पार्न लगाएपछि 

जापानमा एक १८ वर्षीया किशोरीले क्षतिपूर्ति माग गर्दै स्थानीय सरकारविरुद्ध मुद्दा दायर हालेकी छिन् ।


समाचार अनुसार ओसाका नजिकै रहेको उनको माध्यमिक विद्यालयले विद्यार्थीहरुको कपाल कालो रंगको हुनुपर्ने नियम पालना नगरिए विद्यालय छाड्न भनेपछि ती किशोरीले कपाल कालो गरेकी थिइन् । तर आफ्नो प्राकृतिक रुपमै खैरो रहेको कपाल कालो बनाउन प्रयोग गरिएको रंगले आफ्नो कपाल र तालुमा असर पुर्‍याएको उनले बताएकी छिन् ।


काइफूकान हाइ स्कूल नामको बिद्यालयले कपाल रंगाएका विद्यार्थीहरुलाई प्रतिबन्ध गर्ने विद्यालयको नीति रहेको बताएको छ ।


जन्मिंदादेखि नै आफ्नी छोरीको कपालको रंग खैरो रहेको जानकारी उनकी आमाले विद्यालयलाई गराएपनि विद्यालयले बारम्बार ती किशोरीलाई कपाल कालो गर्न निर्देशन दिएको उनकी आमाले बताएकी छिन् ।


किशोरीले क्षतिपूर्तिस्वरुप १९ हजार ३ सय डलर माग गरेको बताइएको छ । स्थानीय सञ्चारमाध्यमका अनुसार ओसाका प्रिफेक्चरले अदालतलाई उनको दाबी अस्वीकार गर्न माग गर्ने भएको छ ।

विद्यालयले यसमा प्रतिक्रिया दिन अश्विकार गरेको छ भने किशोरी गत वर्षको सेप्टेम्बरदेखि विद्यालय गएकी छैनन् ।


जापानमा विद्यार्थी कस्तो देखिने भनेर धेरै विद्यालयमा कडा नियमहरु रहेको पाइन्छ ।


कपालको रंग, मेकअपको प्रयोग र स्कर्टको लम्बाइ, झोला, मोबाइल फोन लगायतमा विद्यालय पिच्छे विभिन्न कडा नियमहरु रहेको पाइन्छ । जापानका विद्यालयहरुले प्रचार गर्ने नयाँ नियम तथा अनुशासन हेरेर समेत अभिभावकहरुले आफ्ना विद्यार्थी भर्ना गर्ने हुनाले जापानमा यस्ता नियम विद्यालय अनुसार फरक र कडा रुपमा पालना गराउने गरेको पाइन्छ ।