जापानमा नेपाली कराते टोलीलाई १ स्वर्ण सहित ४ पदक

Posted on: September 19, 2017 | views: 1427

टोकियो ।

नेपाली कराते टोलीले जापानको फुकुवका शहरमा भएको १२औं सिजि निशिमुरा मात्सुरी फ्रेण्ड्शिप अन्तर्राष्ट्रिय कराते प्रतियोगितामा एक स्वर्ण सहित ४ पदक जितेको छ ।


प्रतियोगितामा एक स्वर्ण सहित एक कास्य पदक पुरुष ४५ केजी तौल समूहमा बिकबहादुर थामीले जितेका हुन् । थामीले कुमुतेमा स्वर्ण र कातातर्फ एक कास्य पदक जितेका हुन् ।


यसैगरि पुरुष ५० केजी तौल समूहमा पुरुषोत्तम पोखरेलले १ कास्य पदक र महिला ५० केजी तौल समूहमा रिमला राईले एक रजत पदक जितेका छन् ।


नेपालको तर्फबाट ३५ केजी तौल समूहमा प्रतिस्पर्धा गरेपनि क्वाटर फाइनलमा अमेरिकी खेलाडीसँग पराजित हुँदा कुइसाङ लामा उपाधि चुम्नबाट बञ्चित भइन् ।

प्रतियोगितामा नेपाल सहित आयोजक जापान, अमेरिका, मलेसिया, भारत, इन्डोनेसिया, क्यानडा लगायत १० राष्ट्रका खेलाडी प्रतिस्पर्धामा थिए ।




यसै प्रतियोगितामा गत बर्ष नेपाली खेलाडी एकता सिंहले नेपाललाई एक कास्य पदक दिलाएकी थिइन् ।

नेपालबाट करातेका खेलाडीहरुको पलायन तथा यस तर्फ आकर्षण घट्दै गइरहेको चर्चाका बेलामा यसपटक भने नेपालले १ स्वर्ण सहित चार पदक हात पारेको छ ।