चिकित्सा शिक्षा विधेयक संशोधन गर्न सांसदहरुको सुझाव

Posted on: April 13, 2017 | views: 120

काठमाडौं । 

व्यवस्थापिका संसदमा विचाराधीन रहेको चिकित्सा शिक्षा सम्बन्धमा व्यवस्था गर्न बनेको विधेयकलाई व्यापक छलफल गरी संशोधन गरेर मात्र पास गर्न सांसदहरुले सुझाव दिनु भएको छ ।


व्यवस्थापिका संसद अन्तर्गत महिला, बालबालिका, जेष्ठ नागरिक तथा समाज कल्याण समितिको  आज बसेको बैठकमा विधेयकको संशोधन प्रस्ताव माथि भएको छलफलको क्रममा सांसदहरुले यस्तो सुझाव दिनु भएको हो ।


छलफलको क्रममा सांसदहरुले नेपालमै चिकित्सा शिक्षा लिन सहज हुने र शिक्षामा पहुँच पुग्ने गरी विधेयक आउनु पर्ने भन्दै विचाराधिन अवस्थामा रहेको विधेयकलाई जस्ताको तस्तै पास गर्न नहुनेमा जोड दिनु भयो ।


बैठकमा नेकपा एमाले सम्बद्ध सांसदहरुले, उपत्यकामा १० वर्षसम्म मेडिकल कलेज खोल्न नदिने भनी विधेयकमा गरिएको व्यवस्था आपत्तिजनक, अव्यवहारिक र निरंकुश शैलीको भन्दै विधेयकलाई सरकारले फिर्ता नै लिनु पर्ने दबाब दिनु भयो ।


नेपाली काँग्रेस र नेकपा माओवादी केन्द्रका सांसदहरुले विधेयकलाई फिर्ता लिन नहुने भन्दै मेडिकल शिक्षालाई थप व्यवस्थित गर्ने सम्बन्धमा परेका संशोधन प्रस्ताव तथा सांसद र विशेषज्ञहरुको सुझावलाई समेत समेटी विधेयकलाई संशोधन सहित छिटो पास गर्नु पर्ने बताउनु भयो ।