१३ महिनासम्म कर्मचारीलाई तलब नदिएपछि जानकी मेडिकल कलेज फेरि पनि बन्द

Posted on: February 20, 2017 | views: 189

जनकपुरधाम ।
जनकपुरको रामजानकी मेडिकल कलेज फेरि पनि बन्द भएको छ । कलेजमा कार्यरत रहेका कर्मचारीहरुले न्युनतम चार महिना देखि १३ महिनासम्मको तलव नपाएपछि औपचारिक रुपमा नै मेडिकल कलेजको सम्पूर्ण सेवाहरु ठप्प पारेका छन् ।

जनकपुरको रजौलमा रहेको सिटि हस्पिटलको आकस्मिक सहितको सम्पूर्ण सेवा, पठनपाठन ठप्प गरेर हडतालमा उत्रेपछि मेडिकल कलेजले प्रदान गर्दै आएको सवै सेवाहरु बन्द भएको छ ।

मेडिकल कलेजको सेवावाट दैनिक रुपमा तीन सय देखि ५ सय विरामीले सेवा पाउनवाट बंचित भएका छन् ।

विगत देखि नै विवादित रहेको जानकी मेडिकल कलेजका कर्मचारी तथा चिकित्सकहरुले आज जनकपुरधाममा पत्रकार सम्मेलनको आयोजना गरेर आफूहरुले काम गरेको अवधिको तलव भत्ता पाउनु पर्ने माग गर्नु भएको छ । आफूहरुले आज देखि आकस्मिक सहितको सवै सेवाहरु ठप्प गरेको चौधरीले बताउनु भयो ।

मेडिकल कलेजमा हाल २ सयको संख्यामा कर्मचारीहरु कार्यरत रहेको र सवैको तलव भत्त गरेर करिव १५ करोड बाँकी रहेको संघर्ष समितिका अध्यक्ष संजय चौधरीले बताउनु भयो । जनकपुर क्षेत्रका एक मात्र मेडिकल कलेज भएकाले यसको विकासका साथै आफूहरुको रोजी रोटीको ज्ञारेन्टी हुनु पर्ने धारणा चिकित्सक डा. अरुण कुमार गुप्ताले बताउनु भयो ।

त्रिभूवन विश्वविद्यालय अन्तर्गत सञ्चालित रहेको जानकी मेडिकल कलेजमा १ सय सिट एम वि वि एसको रहेको छ । ६ सय वेडको अस्पताल पनि रहेको छ ।