सरकारी अस्पतालमा आकर्षित गर्ने गरी काम गरिरहेको छु-मन्त्री थापा

Posted on: February 17, 2017 | views: 527

भक्तपुर ।
स्वास्थ्य मन्त्री गगन थापाले आम नागरिकलाई उपचारका लागि सरकारी अस्पतालमा आकर्षित गर्ने गरी सरकारले काम गरिरहेको बताएका छन् ।

भक्तपुरको मानव अंग प्रत्यारोपण केन्द्रमा अत्याधुनिक मोडुलर अपरेशन थिएटरको उद्घाटन गर्दै मन्त्री थापाले सरकारी अस्पताललाई जनशक्ति र आधुनिक उपकरणले सुबिधा सम्पन्न बनाउने तयारी भैरहेको बताए ।

उनले सरकारी अस्पताललाई सुदृढ र तिनको सेवा बिस्तार गर्दै नागरिकलाई स्वईच्छाले उपचारका लागि सरकारी अस्पताल आउन आकर्षित गर्ने गरी मन्त्रालयले काम गरिहेको बताए ।

स्वास्थ्य सेवा सर्वसुलभ बनाउन र यसमा सबैको पहुँच पुर्याउन मन्त्रालयले कुनै कसर बाँकी नराखी काम गरीरहेको बताउँदै उनले अहिलेको बजार मूल्य भन्दा सहुलियत दरमा अस्पतालमा छिटो औषधी पुर्याउन पहल भैरहेको जानकारी दिए ।

नेपाल मै पहिलो पटक सफल रुपमा कलेजो प्रत्यारोपण गरेर नेपालले स्वास्थ्य क्षेत्रमा ठूलो उपलब्धि हासिल गरेको बताउदै मन्त्री थापाले सरकार जुनसुकै सहयोग गर्न तयार रहेको बताए ।

केन्द्रलाई स्थान अभाब भएको सन्दर्भमा नेपाल ट्रष्टको जमिन केन्द्रलाई उपलब्ध गराउनका लागि मन्त्रालयले प्रधानमन्त्रीको ध्यानाकर्षण गराइसकेको मन्त्री थापाको भनाई छ ।

केन्द्रका कार्यकारी निर्देशक डा. पुकारचन्द्र श्रेष्ठले प्रत्यारोपणलाई आवश्यक पर्ने अत्याधुनिक साधनहरु समेटिएको २ वटा अत्याधुनिक मोडुलर अपरेशन थिएटरको स्थापनाले केन्द्र प्राबिधिक रुपमा आत्मनिर्भर भएको बताए ।

नेपालमै पहिलो पटक उच्च स्तरको मोडुलर ओ.टी.को स्थापना भएको बताउँदै डा श्रेष्ठले यसबाट केन्द्रलाई कलेजो प्रत्यारोपण र जटिल शल्यक्रियालाई अझै सहज बनाउन र निरन्तरता दिन हौसला थपिएको बताए ।