काठमाडौ र ललितपुरका ३४ क्लिनीकमा छापा, पाँचवटा सिलबन्दी

Posted on: November 14, 2016 | views: 400

२९ कार्तिक, काठमाडौं ।
स्वास्थ्य मन्त्रालयको टोलीले आज काठमाडौ र ललितपुरका ३४ ओटा क्लिनीक तथा फार्मेसीहरुमा अनुगमन गरी प्रक्रिया पुरा नगरी सञ्चालनमा रहेका पाँच ओटा क्लिनीकलाई सिलबन्दी गरेको छ ।

स्वास्थ्य मन्त्रालयल, स्वास्थ्य सेवा विभाग, जिल्ला जनस्वास्थ्य कार्यालय, प्रहरी, सञ्चारकर्मी लगायतको टोलीले गरेको अनुगमनका क्रममा काठमाडौका ४ र ललितपुरको १ क्लिनीकमा सिलबन्दी गरिएको स्वास्थ्य मन्त्रीको निजि सचिवालयले जनाएको छ ।  

स्वास्थ्य सेवा विभागका डा हेमन्त ओझाको नेतृत्वमा रहेको काठमाडौको टोलीले दर्ता नै नभएका बानेश्वर देखि कोटेश्वर सम्म रहेका जागरण क्लिनीक, एसआरडी डाइनोष्टीक, लोकसेवा डेण्टल क्लिनीक र अपी डेण्टल क्लिनीकमा तालाबन्दी गरिएको हो ।

त्यस्तै केही फार्मेसीहरुमा भने पर्याप्त जनशक्तिको व्यवस्था नगरेको, फार्मेसी नपढेकाले पनि औषधी विक्री गरेको लगायतका कमजोरी देखिएकाले उनीहरुलाई आवश्यक निर्देशन दिनुकासाथै स्पष्टीकरणपनि मागिएको डा। ओझाले जानकारी दिनुभयो ।

त्यसैगरी ललितपुरमा स्वास्थ्य मन्त्रालयको चिकित्सा महाशाखाका प्रमुख डा भोलाराम श्रेष्ठको नेतृत्वमा खटिएको टोलीले जाउलाखेलमा रहेको दर्ता नभई सञ्चालनमा रहेको गुहेश्वरी डेण्टल मल्टी स्पेर्यालीटीमा तालाबन्दी गरेको छ ।