अवकाश पाउन लागेका सिंह आइओएमको डिन नियुक्त, डा केसीद्वारा विरोध

Posted on: November 13, 2016 | views: 534

२८ कार्तिक, काठमाडौं ।
अवकास पाउन ४ महिना मात्र बाँकी रहेका पा. केशव प्रसाद सिंहलाई चिकित्साशास्त्र अध्ययन संस्थान 'आइओएम'को डिन नियुक्त गरिएको छ ।

त्रिवि उपकुलपति कार्यालयले नौ महिनापछि आइतबार साँझ बैठक बसेर उनलाई डिन नियुक्त गरेको हो । वरिष्ठताका आधारमा डिन नियुक्त हुनुपर्ने भन्दै एउटा प्रणालि बसाएर आइओएम अघि बढाउनुपर्ने माग गर्दै आउनुभएका सामाजिक अभियन्ता डा. गोविन्द केसीले भने डिन नियुक्तीको बिरोध गर्नुभएको छ ।

डिन सर्च कमिटीले प्रा डा जगदीशप्रसाद अग्रवाल, प्रा डा केपी सिंह र प्रा डा ज्योति शर्माको नाम डिनका लागि सिफारिस गरेको थियो । यसमध्ये प्रा. डाक्टर ज्योति शर्मा वरिष्ठताको आधारमा अगाडी रहेको बताइन्छ ।

तर त्रिविका उपकुलपति डा तीर्थ खनियाँले डा सिंहलाई आइतबार नै पत्र बुझ्ने गरी डिन नियुक्त गरेका छन् ।
विसं २०४५ मङ्सिर ८ गते आइओएममा नियुक्त भएका उनले चार वर्षअघि त्रिवि शिक्षण अस्पतालको निर्देशकको जिम्मेवारी सम्हालेका थिए ।

डा केसीले वरिष्ठताका आधारमा डिन नियुक्त गर्नुपर्ने आफ्नो माग यथावत् रहेकाले सो नसच्याए आफूले फेरि अनशन बस्ने चेतावनी दिनुभएको छ । उहाँले भन्नुभयो, “मैले कसैलाई व्यक्तिगत फाइदाका लागि नभई सिङ्गो चिकित्सा शिक्षाका लागि सिस्टममा चल्नुपर्ने मान्यताअनुसार नै वरिष्ठताका आधारमा डिन नियुक्ति हुनुपर्ने माग अघि सार्दै आएको छु । डा सिंहको नियुक्ति वरिष्ठताका आधारमा नभएकाले मेरो असहमति छ ।”

उपकुलपति खनियाँले भने बाहिर जसले जे भने पनि वरिष्ठताका आधारमा नै डिन नियुक्त गरिएको तर्क गर्दै सिफारिस गरिएका मध्ये डा सिंह नै वरिष्ठ भएको जिकिर गरे ।

सामाजिक अभियन्ता डा. केसीले भने सिफारिस गरिएका मध्ये भन्दापनि त्रिविमा रहेका प्राध्यापक मध्येबाट वरिष्ठताका आधारमा हुनुपर्ने बताउनुभएको छ ।

चिकित्सा शिक्षा सुधार र विकृतिविरुद्ध नौ पटकसम्म आमरण अनशन बसिसक्नुभएका प्रा डा केसीले आइओएमको डिन नियुक्ति वरिष्ठताका आधार नभएकाले यसलाई नसच्याए आइतबार अपराह्न ३ बजेदेखि अनशन सुरु गरिने चेतावनी दिनुभएको छ ।