पर्वत जिल्ला अस्पतालमा औषधीको अभाव

Posted on: October 29, 2016 | views: 282

१३ कार्तिक, पर्वत ।
पर्वत जिल्ला अस्पतालमा अत्यावश्यक औषधीको अभाव भएको छ । सरकारले निशुल्क वितरण गर्ने ज्वरोमा प्रयोग गर्ने सिटामोल, पखालामा प्रयोग हुने मेट्रानिडाजोल, संक्रमणमा प्रयोग हुने एण्टि वयोटिक एमोक्सिसिलिन लगायत १८ किसिमका औषधीको अभाव भएको छ ।

दमका विरामीले नियमित सेवन गर्ने साल्वुटामोल ४ एमजी, दुखाईमा प्रयोग गर्ने आईव्रुफिन, वुस्कोपान, आखाँको औषधी सिप्रोफ्लाक्सिन, जुकाको औषधी अल्वेण्डाजोल लगायतका अत्यावश्यक औषधी अस्पतालमा सकिएको जिल्ला अस्पतालका निमित्त प्रमुख डाक्टर सरोजचन्द्र दहालले जानकारी दिनुभयो ।

अहिले स्लाइन र गर्भवती महिलालाई निशुल्क वितरण गरिने आइरन चक्किको समेत अभाव भएको उहाँले बताउनुभयो । सरकारले ७२ प्रकारका आवश्यक औषधी निशुल्क वितरण गर्ने भनिए पनि जिल्ला अस्पतालमा मुस्किलले ३० प्रकारका औषधीहरु मात्रै वितरण हुने गरेको छ । जिल्ला अस्पतालमा औषधीको स्टोर रित्तिन थालेपछि विरामीहरुलाईै नीजि क्लिनिकमा औषधी किन्न पठाईने गरेको छ ।

पोहोर साल ढिलो गरि औषधीको टेण्डर पठाएका कारण अहिले सम्म औषधी आयात हुन नसेकेको डाक्टर दहाललले बताउनुभयो । जिल्लाका ग्रामीण क्षेत्रमा रहेका स्वास्थ्यचौकीमा पनि औषधी पाउन नसकेको सर्वसाधारणहरुले बताउने गरेका छन् ।

गर्मी मौसम सकिएर जाडो मौसम शुरु भएको यो बेला विरामीहरुको चाप वढेको छ । यो बेला दमका विरामीहरु बढि मात्रामा आउने गरेका छन् । त्यस्तै रुघाखोकी र ज्वरोका विरामीहरुको चाप वढेको छ । जिल्लामा औषधीको अभाव संगै विरामीहरुले सास्ती पाएका छन् ।