सरकारले ऋण दिने भएपछि नेपाल औषधि लिमिटेड सञ्चालन गर्न तयारी

Posted on: September 20, 2016 | views: 445

४ असोज, काठमाडौं ।
लिमिटेडलाई पुनः संचालन गर्ने निर्णयसंगै कम्पनीले औषधी उत्पादनका लागि आवश्यक आन्तरिक तयारी शुरु गरेको छ ।

कम्पनीको पुनः संचालनका लागि प्रस्तावित बजेट प्राप्त भएको ३ महिनामा सरकारलाई उत्पादन बेच्ने गरी आवश्यक तयारी भएको कम्पनीका निमित्त महाप्रवन्धक रामेशकुमार महतोले बताउनु भयो ।

सरकारले आफना मातहतका अस्पताल तथा सरकारी सुविधाको रुपमा जनतालाई अपलब्ध गराउने औषधीमात्र उत्पादन गरेको खण्डमा पनि नेपाल औषधी लिमिटेड सहजै संचालन हुन सक्ने देखिएको छ । सरकारले विभिन्न ७० थरीका औषधी जनतालाई निशूल्क रुपमा वितरण गर्ने गरेको छ ।

हाल औषधी कम्पनी लिमिटेडले पहिलो चरणमा विभिन्न ४८ प्रकारका औषधी उत्पादन गर्ने भए पनि तत्काल भने सिटामोल, जीवनजल आईरन चक्की जस्ता अत्यावश्यक ८ प्रकारका औषधी उत्पादन गर्ने तयारी गरेको छ ।

गत बर्ष मात्र नेपालमा २६ अर्बको औषधी आयात भएको अर्थ मन्त्रालयको तथ्याङकमा उल्लेख छ ।

नेपालमा हाल बर्षेनी अर्बै रुपैया वरावरको औषधी खपत हुने गरेकोमा करिव ५० प्रतिशत औषधि नेपाली निजी कम्पनीहरुले उत्पादन गर्दछन भने ५० प्रतिशत विभिन्न मुलुकहरुबाट आयात हुने गरेको छ  । आयातको पनि ८० प्रतिशत भन्दा बढी भारतबाट मात्र आयात हुने गरेको छ  ।